واش المغاربة ماكيفرقوش بين مشهد جنسي ومشهد اغتصاب؟. منوضين فضيحة على سين عنيفة من فيلم "بورن آوت" ديال لخماري خرج ف2017 فيها دريس الروخ وسارة پيرليس وواصفينها ب"مشهد جنسي".. واعداء الفن كيطالبو بسينما "نقية"!

مشهد تمثيلي ففيلم فيه ادريس الروخ وسارة بيرليس منوض روينة على مواقع التواصل بعدما تنشر مقطع من فيلم "Burn Out بورن آوت"، تزامنا مع عرض فيلم "جرادة مالحة" من إخراج الروخ فالسينمات.
المقطع اللي منوض هادشي كامل، كيبان فيه الروخ وهو كيعنف ويغتاصب الممثلة المغربية-البرتغالية سارة بيرليس.. ولكن خوتنا المغاربة ماشافوهش هكا، شي وصفو ب"مشهد كيخدش حياء المغاربة" و"لا أخلاقي ومسيئ"، وقالك هادشي دخيل على المشاهد السينمائية فالأفلام المغربية، وكاين اللي قال انه مشهد جنسي وعيب يكون.
مشهد جنسي؟ اولا، هذا راه مشهد فيه عنف وتعنيف واغتصاب، مايمكنش نخلطو بين هاد الجوج الا الى كنا بصح غارقين فثقافة الاغتصاب وماعندنا حتى فكرة على كيفاش كتكون علاقة جنسية رضائية. ثانيا، شي جهلة وكارهي الفن كيوصفوه كفيلم "غير نظيف"، على اساس ان السينما خاص تكون نظيفة ومغسولة بجاڤيل! هاد الناس مكتفهم والو فالسينما وغالبا كتكون عندها انتماءات متطرفة ومدعششة وكيخلطو بين الممثل(ة) وحياتهم فالواقع والشخصية اللي كيلعبو – بحال كيف وقع مع الممثلة لبنى ابيضار مع فيلم Much Loved ديال نبيل عيوش.
الفيلم خاصو نقد بمعايير فنية وسينمائية: واش السيناريو مزيان، واش التمثيل ناقص، واش الاخراج فالمستوى... ماشي واش نقي ولا موسخ، واش دخيل على ثقافتنا ولا لا.. الجنس، الاغتصاب، العرا، الشراب وزيد وزيد ماشي دخلين علينا، بل كاينين وحاضرين فمجتمعنا كبشر، وخاص يكون عادي نهضرو عليهم وناقشوهم فافلامنا.
هاد الهجوم بين على ان السينما المغربية صعيب توصل للعالمية بسبب الرجعيون واعداء الفن والابداع اللي خلاو الفيلم كامل ورسائلو فحال الاجهاض، الدعارة و الفوارق الطبقية، وركزو على لقطة اغتصاب.
وبورن آوت هو فيلم دراما مغربي من كتابة وإخراج نور الدين لخماري، وبطولة سارة بيرلس، مرجانة العلوي، أنس الباز، إدريس الروخ، وغيرهم. وكان تختار باش يمثل المغرب ففئة جائزة الأوسكار لأفضل فيلم بلغة أجنبية فحفل توزيع جوائز الأوسكار ال91.