النصيري كيواصل تحقيق الأرقام وغير الإصابة اللي تقدر تمنعو من كأس العالم

كيواصل الدولي المغربي يوسف النصيري تحقيق الأرقام بقميص فريقو إشبيلية الصبليوني من بعدما ماركا على كونهاكن الدنماركي البارح الثلاثاء، فشومبيونزليك.
يوسف النصيري اللي دخل كبديل فالشوط الثاني ولعب غير دقايق قلال وخرج حيث توعت، نجح فافتتاح التسجيل لإشبيلية، وهو البيت اللي رفع بهم عدد الأهداف ديال اللعابا المغاربة فدوري أبطال أوروبا إلى 59 هدف.
المهاجم المغربي رفع أيضا الرصيد ديالو من البيوتا اللي ماركيهم فشومبيونزليك، من بعد الهدف اللي سجل كوبنهاكن الدنماركي إلى 8 أهداف، ووصل على كل من الدولي المغربي السابق مروان الشماخ والنجم المغربي الأخر حكيم زياش اللعاب ديال تشيلسي الننكليزي اللي حتى هما ماركين 8 لبيوت.
وكتبقى فرص يوسف النصيري فالمشاركة مع المنتخب الوطني المغربي فكأس العالم المقبل بقطر، بهاذ المستوى كبيرة بإستثناء إلى كانت الإصابة اللي تعرض لها فماتش البارح صعيبة حيث هي اللي تقدر تمنعو من التواجد مع ليكيب ناسيونال فالمونظيال، وهو الأمر اللي غادي يكون صعيب القبول به حيث الناخب الوطني وليد الركراكي معول عليه وأكد هاذشي فأكثر من مرة، فانتظار الكشف على الحالة الصحية ديال اللعاب.