ميساج قوي من "الوينرز" لجماهير الوداد واللعابا ديال الحمرا من بعد التعادل ضد التواركة

أكد فصيل الوينرز المساند للوداد الرياضي أن الفريق الأحمر قدم ماتش مزيان ضد التواركة فالجولة الماضية من البطولة الإحترافية لكرة القدم، ومن أحسن ليماتش اللي لعب بالرغم من أنه تعادل وما قدرش يربح 3 بوان، ووصى الوداديين باش يبقاو واقفين مع الحمرا كيفما كانت النتيجة.
وبخصوص مستوى الوداد فالماتش اللي فات ضد التواركة قال "الوينرز": "فأرضية الميدان قدم الفريق واحدة من أفضل المباريات، حيث سيطر بالطول والعرض وخلق بزاف من الفرص ضاعت متابعة.. والتعادل السلبي تبين أنه واقع وما منو هروب، وحتى ضربة الجزاء اللي ضاعت فآخر الدقائق أكدت هاذ الواقع".
الفصيل الودادي كان واضح ووجه ميساج لجمهور الفرقة وقال لهم: "حنا فكفة وحدة في الانتصارات وايضا فالتعادلات والهزائم، وخاصنا نتحلاو بالمسؤولية وبلاما نبحثو البحث على شي شماعة نعلقو عليه أي تعثر، راه ممكن نغضبو وننتقدو ولكن ديما غادي نساندو، خاصنا نكونو الدرع اللي كيحمي النادي فالتعثرات قبل الانتصارات، وديما نجمعو الشمل وبسرعة بدون ما نخليو المجال لمن ينتظر ويتربص بنا وكيبحث عن أي ضربة جزاء نعطيوها له باش يصرف الحقد ديالو، خاصنا نكونو أذكياء بما يكفي من أجل مصلحة الوداد العليا".
وعن ضياع النقاط ضد التواركة قال "الوينرز": "ضياع 2 النقاط داخل الميدان أمر مرفوض، ونتمناو تصحيح الأخطاء فمرحلة توقف البطولة، ومن حسن الحظ أن المرحلة الأولى تم تجاوزها بنجاح والفريق متصدر للترتيب، المرحلة القادمة ما بعد مونديال قطر غادي تكون أصعب والمطلوب هو تجهيز الفريق من كافة المستويات لتدبير كافة الواجهات بشكل مزيان، وكنتسناو ردة فعل قوية من كافة اللعابا ومن الطاقم التقني للحفاظ على المكتسبات، والاعذار لن تكون مقبولة مستقبلا، راه حنا واعيين بلي نعي عندنا أجود العناصر سواء اللاعبين او الطاقم وحنا واثقين فيهم باش يعطيونا النتائج اللي بغينا".
وشدد "الوينرز" فالميساج ديالو: "راه بالكثير من الخدمة، وبالهدوء والصبر راه قادرين نحققو أن الهدف اللي باغين، خاصنا نواصلو الدعم والمساندة بنفس الروح العائلية ونخدمو كاملين على تصحيح ريوسنا أولا وكل واحد فينا يفكر فالطريقة اللي يمكن تعطي الاضافة كيفما كانت".