المغرب تهنا من اكبر داعم للبوليساريو والجزاير.. جيمس انهوف خرج من الكونگريس وعوضو ماركواين مولين المقرب من ترامب

السيناتور المريكاني جيمس إينهوف، اللي ديما ضدنا وضد ديبلوماسيتنا، خرج من الكونگريس، بعدما ربح النائب عن أوكلاهوما ماركواين مولين المقعد ديال هاد الجمهوري المتقاعد.
السيناتور جيمس إنهوف هو من اكبر الداعمين ديال الجزاير والبوليساريو، وديما كان كيحاول يدفع الرئيس جو بايدن باش يتراجع على قرار دونالد ترامب، بالاعتراف بمغربية الصحراء، واخر مادار قبل مايتقاعد، كان طلب باش تحول مناورات الأسد الإفريقي من المغرب لمكان آخر.
وغايكون الجمهوري مولين اول مريكاني اصلي (حيت هو مواطن من امة الشيروكي) من هادي دابا تقريبا قرن، كيمثل ولاية أوكلاهوما فمجلس الشيوخ الأمريكي.
نورمالمون الحزب الجمهوري اللي كينتمي ليه إنهوف ومولين، هو من جهة المغرب وديما علاقات الرباط وواشنطن كتكون مزيانة فالوقيتات اللي كيكونو فيها الجمهوريين فالحكم.. ولكن مع هاد مولين مازال ماعارفينش!
حيت مولين كان قال انه الى تنتانب غادي يستامر فنفس التوجه ديال انهوف، وحتى هو باغي يكون فلجنة القوات المسلحة باش يضمن دفاع وطني قوي. وفنفس الوقت، كاينة تقارير كتقول انه قريب بزاف من ترامب وحليف ديالو، وف2020، كان الرئيس الامريكي السابق دعم مولين والاخر قال انه فخور بهاد الدعم.. وهادشي يقدر يخدم المغرب ومصالحو..
الوقت غايبين لينا واش حتى هذا غايتبع اللوبي الجزايري وغايخدم مصالح جبهة البوليساريو، ولا غادي يختار يكون عندو افكار وطريقة وتوجه اخر، كيشبه للحزب ديالو الجمهوري...