جاريد كوشنر نسيب ترامب واكبر مستشارو فكتابو الجديد: قبل مانزور المغرب المرة اللولة وصفولي الملك محمد السادس بانه بيزنيس-مان ذكي بزاف وان شعبو كيبغيه.. وشحال ما قلبت وبحث فالتاريخ شحال ما زدت تيقنت وتأكدت ان الصحراء مغربية بدون اي شك

جاريد كوشنر نسيب الرئيس المريكاني السابق، دونالد ترامب، خرج نهار الثلاثاء كتابو "كسر التاريخ: مذكرات البيت الأبيض – Breaking History: A White House Memoir" للبيع بشكل رسمي، وهو الكتاب اللي كيعاود فيه مذكراتو فاش تولا منصب كبير مستشاري ترامب من 2016 إلى 2020، واللي من ابرزها اتفاقات ابراهام.
كوشنر كشف فهاد الكتاب بعض الأسرار، ومن بين القضايا الرئيسية اللي هضر عليها كاين المغرب والملك محمد السادس وتطبيع او استئناف العلاقات مع اسرائيل واعتراف امريكا بمغربية الصحراء.
وقال كوشنر بخصوص السفر ديالو اللول للمغرب فابريل 2019: "وصفولي الملك محمد السادس كبيزنيس مان ذكي بزاف وملك عندو شعبية كبيرة فبلادو، وعرفت انه باش يقبل تطبيع العلاقات مع اسرائيل فغادي يخص بلادي (امريكا) تعتارف بمغربية الصحرا، ومكاينش شرط او حل اخر ممكن".
واضاف مستشار ترامب السابق ان محمد السادس هو اللي قاد اللقاء ديالو مع الحاخام رابي بينتو باش مشاو زارو المقبرة فين مدفون جد بينتو، وقال ان هاد الجيست كان زوين بزاف من طرف الملك. وعاود كوشنر: "من بعد علموني ان الملك عارضني للعشا فدارو، ووجدولينا بوفي عامر بالماكلة كوشير حدا لابيسين، وفساعة الفطور، حيت كان رمضان، گلس معنا حتى ولي العهد الامير مولاي الحسن اللي جاني ناضج بزاف على سنو وعندو علاقة زوينة مع باه.. بينما بعض ولاد الحكام كيكونو غير ناضجين ولي العهد كان حاضر واونگاجي معنا فالهضرة..".
واعتابر كوشنر المغرب بلد استقرار، على عكس جيرانو، وقال انه عندو حكومة مستقرة واقتصاد مزيان وعلاقة مخيرة مع مريكان، واكد: "الى بغينا الصحرا تكون بلاصة امنة وخالية من الارهاب وعدم الاستقرار فخاص المغرب هو اللي يكونطروليها.. واصلا شحال ما قلبت فالتاريخ شحال ما زدت تيقنت ان الصحراء مغربية بدون اي شك".
وبخصوص الاعتراف الأمريكي بسيادة المغرب على الصحراء، كشف كوشنر أن من العوائق اللي اعترضت هاد القرار، هو السناتور المريكاني الجمهوري جيمس إينهوف الرئيس الأسبق للجنة القوات المسلحة المعروف بمواقفو المؤيدة للبوليساريو، ولكن قدرو فالاخير يقنعوه.
وهضر كوشنر فالمذكرات حتى على زيارتو للمغرب ف2020 فمهمة توقيع اتفاق استئناف العلاقات بين الرباط وتل أبيب، وهو الاتفاق اللي تضمن الاعتراف الأمريكي بسيادة المغرب على الصحراء، وقال ان محمد السادس استقبلو هو والمستشار الأمني الخاص لبنيامين نتنياهو، مئير بن شبات ومشاو للبيرو ديالو، اللي كانت فيه ريحة العود وطابلو كبير فيه الشجرة ديال العائلة العلوية. وقال كوشنر ان الملك، اللي معروف بذوقو الرفيع، كان لابس كوستيم كحل مخيط مزيان، وواخا كورونا استقبلهوم استقبال حار.
وتحدث كوشنر فنفس المذكرات على العراقيل اللي اعترضت الاتفاق بين بلادنا واسرائيل على تطبيع العلاقات، وقال ان القضية وصلات لتهديد المغرب بإلغاء الاتفاق كامل، الى غادي تشتارط اسرائيل فتح سفارة فالمغرب، وماشي غير مكتب الاتصال . وزاد كوشنير: "داك الساعة قلت لنتنياهو: عفاك بيبي غير تيق بيا فهاد النقطة، الملك انسان متأني وغريزي وهادشي هو اللي غادي نقدرو نوصلو ليه معاه دابا، نعطيوهم تقتنا حاليا، ومن بعد انا متأكد ان الامور غادي تطور فصالحنا".