بايتاس حضر ماتش بلجيكا ولكن كيفاش ضبر على vip وعلى لوطيل اللي غاليين بزاف وفاش سولاتو "گود" واش وزراء الحكومة حضرو المونديال ها باش جاوب

مصطفى بايتاس، الناطق الرسمي باسم الحكومة، حضر لماتش المغرب ضد بلجيكا، حسب فيديو منشور في صفحة محمد بودريقة زميله في الحزب (الأحرار) وعضو الجامعة الملكية لكرة القدم.
https://fb.watch/hhRIfUUHsi/?mibextid=cr9u03
وحسب مصدر حزبي فإن بايتاس هو اللي خلص الطيارة باش مشا لقطر، ولكن السؤال كيبقا واش حتى هو تزاحم مع صحاب 5 الاف ردهم وشكون عطاه يدخل "ڤي آي پي".
هذا ناطق رسمي باسم الحكومة، مكانش حتا خبار واش استقبلتو السفارة وعلاش متسوقاتش ليه وما رسلاتش ليه طونوبيلة وشكون نقدو ودبر ليه على اوطيل يبات ديك الليلة قبل ما يرجع.
غير هو بايتاس، باش سولاتو "گود" واش وزراء حكومة اخنوش مشاو لقطر يدعمو المنتخب، وشكون مشا وشكون غادي يمشي يشجع الأسود فالماتش جاي ضد البرتغال، كان جوابو غريب وفيه هروب، بحيث قال بأن الحكومة لم تطلب الذهاب إلى قطر.
كولشي كيعرف بلي باش وزير يخرج لبرا المغرب خصو إذن من القصر، ولكن بايتاس مقالش هادشي ومعترفش بلي حضر للمونديال.
وأضاف بايتاس، خلال الندوة الصحفية المخصصة لأشغال المجلس الحكومي المنعقد صباح اليوم الخميس، "الحكومة مطلباتش تمشي لقطر، ووزير التربية الوطنية والرياضة تنقل وحضر من خلال إشرافه على الرياضة، وكان حاضرا في المباراة الأخيرة".
وتابع بايتاس :"واش الوزراء مغاربة، مغاربة طبعا وباغين يعيشو دوك الأجواء بشكل متجرد عن المهام الرسمية ولكن واش الحكومة طلبت باش تنقل، راه لم تطلب".
هادشي لي قال بايتاس يؤكد بلي ان وزير الخارجية ناصر بوريطة لي حضر، ماحضرش باسم الحكومة، وبأنه مشا بتكليف من رئيس الدولة.