مول لفضايح الفاشل السعيدي اللي عطاه بنسعيد إدارة المركز السينمائي.. مدير بالنيابة فمنصب تفتح فيه التباري باقي كيدير مابغا فالمركز ويخرج القرارات وها آخر فضايحو

فضايح خالد السعيدي، مدير المركز السينمائي المغربي بالنيابة مبغات تسالي، فمور ما تسبب عدم قيامو بمهامو فمشكلة كبيرة تقدر تكون عندها تبعات سياسية خايبة ففيلم "زوايا الوطن. زوايا الصحراء"، ديال ماجدة بنكيران، اللي بغات حتى هي تتنصل منو، اليوم بنفس المنطق طلب من فيدرالية المهرجانات السينمائية تقترح أسماء شخصيات تكون فلجنة دعم تنظيم المهرجانات.
هادشي جا فمراسلة صيفطها المدير بالنيابة السعيدي لفيدرالية المهرجانات السينمائية يوم 30 دجنبر، أي غير مور ساعات من فتح الوزير المكلف بالقطاع المهدي بنسعيد، المنصب للتباري.
مدير المركز السينمائي المغربي بالنيابة كيطلب من المهرجانات اقتراح أسماء من سيمنحهم الدعم في لجنة الدعم للمهرجانات والتظاهرات السينمائية.
الغريب فالرسالة بداها إلى السيد رئيس فيدرالية المهرجانات وسالاها ب"تفضلوا السيد رئيس الجامعة الوطنية المحترم بقبول فائق التقدير والاحترام".. مدير تالف حتى فكتابة رسائل، ماشي غير فالإساءة لقبيلة الركيبات الكبيرة لي عندها تاريخ عظيم فدعم الوحدة الترابية.
هاد المدير من نهار تفتح منصبه للتباري، كيخرج فالقرارات بسرعة خيالية، باغي يدير كولشي قبل ما يصيفطوه بحالو. هاد الفضيحة ديال لجنة الدعم فيها شبهات كثيرة. خاص الوزير يفتح تحقيق داخلي وإلا غايكون هاد المدير كبر من الوزير.