مول لفضايح الفاشل السعيدي اللي عطاه بنسعيد ادارة المركز السينمائي كينتاقم. مسؤول من نهار وصل ولفضايح كتزاد وعوض يجري عليه لوزير خلاه ينتاقم من اطر المركز وخرج حقدو فواحد من احسن هاد الاطر: طارق خمالي

قرار عجيب وغريب دار مدير المركز السينمائي المغربي بالنيابة خالد السعيدي، بتوقيف طارق خلامي٬ رئيس قسم للترويج والتعاون فهاد المركز. غريب لان هاد المدير بالنيابة كولو فضايح. معاه القطاع كيعيش اسوأ ايامو. معاه عاش فضايح كبيرة ومتتالية.
هاد المدير بالنيابة اللي تسبب عدم قيامو بمهامو فمشكلة كبيرة تقدر تكون عندها تبعات سياسية خايبة ففيلم "زوايا الوطن. زوايا الصحراء" ديال ماجدة بنكيران اللي بغات حتى هي تتنصل منو.
دابا الركيبات اللي حسو بالاهانة غاديين يرفعو شكاية للديوان الملكي وقررو يصعدو. شكون مول لفضيحة؟ هو هاد السعيدي.
دابا خرج قرارو الانتقامي من ولد هاد المركز. درج فيه. عندو علاقات مزيانة مع المهنيين. واحد فيدو وكيخدم.
هاد المدير بالنيابة حيد خلامي وبطريقة كتبين على شخصيتو. اللي داعمو فهاد التخربيق هو بنسعيد وزير الشباب والثقافة والاتصال. علاش؟ لان الوزير خرج قبل ما ياخد هاد المسؤول هاد القرار٬ دار اعلان على شغور المنصب.
الوزير هو المسؤول علي هاد المركز. القانون كيقول انو "مؤسسة عمومية تخضع لوصاية وزارة الشباب والثقافة والتواصل، ويتمتع بالشخصية القانونية والاستقلالية المالية" اي تابع ليه.
الوزير هو اللي خاصو يدخل. مادام ان المنصب ديال مدير المركز السينمائي شاغر٬ ما يمكنش لهاد الشخص يتاخد قرارات انتقامية.
واش هاد المدير بالنيابة فوق الوزير لي قرر يفتح باب التباري فهاد المنصب؟ علاش تاخد القرار بتاريخ 29 دجنبر وهو ثاني يوم من قرار الوزير بفتح باب التباري.
بوسعيد خاصو يدخل اليوم قبل غدا وحتى المهنيين خاصهم يحتجو كلا بطريقته على هاد القرار ايلى بان ليهم مجحف