علاش مقترح التوظيف بالكونطرا بالوظيفة العمومية ما خدامش ؟

1- لأنه غيعاود نفس أخطاء المغادرة الطوعية وانخسرو لفلوس اللي زايدين فالأجور السمينة وفالأخير المردودية هي نفسها بتكلفة أكثر وهو ما سيضرب مبدأ الحكامة الجيدة
2- الى كان المقترح كيقول باللي التعاقد غيكون لمدة محددة بسنتين راه مايمكنش واحد يبدا خدما ولا مشروع ولا سياسة عمومية وتجيه بعامين تقولو اللي جانا يجيه لخير تسالا وقتك، لأنه من الطبيعي أن اللي غيجي موراه فنفس البوسط غتكون عندو نظرة أخرى ومنهجية أخرى وغيدضرب التراكم ف زيرو فحال اللي كيديرو جميع الوزراء الجداد
3- هاداك الزغبي مول الكفاءة اللي غيجي من القطاع الخاص أول حاجة غيصدادم مع مسامر الميدة فالإدارات وغيديروليه ضربة ومسة لأن الأغلبية ما فيهم ما يخدم وأراك للشواهد وليكومپلو والريتم ديال الإدارة ماشي هو ديال القطاع الخاص، حيت أي موظف فراسو بأنه مخلص مخلص وبالتالي كيدير لو مينيموم
4- إيوا ملي غيسالي هاد الزغبي هامين في الجحيم شنو غيدير من بعد؟ غيرجع يقلب على خدمة وبالتالي احتمال ارتفاع نسبة البطالة ديال أصحاب الشواهد من جهة وديال أصحاب الكفاءة اللي تسالات مدة الصلاحية ، وهنا مشاكل أخرى اجتماعية واقتصادية …
5- اقتراح هاد المشروع فرمضان فيه بزاف ديال القوالب وكان باغين يدوزوه بالساكوتي حيت كلشي ملهي فالصيام والحريرة ولا مشا يصوم فكوسطا ديل سول وبنادم عطلة والبرلمانيين ملهيين مع التزكيات …
أودي الى كان الهدف ديال الحكومة هو تفويت المرفق العمومي بالتدريج غير تفكر بعدا قبل فشي حاجة معقولة ما يبقاوش غا كيرونو راه مستقبل ديال بلاد هذا ماشي يوماين ديال ولاية حكومية