و الله من نْصْوطُو

بالدارحة : زاوية تكتب عمدا على تازاسيتي بالدارجة
الانتخابات أمرها عجيب، فيمكنا نقولو بلي كيزيدلها غير اللي ما فهامش قيمة المسؤولية أو مكيحشمش، لأن اللي كيعرف بحق المسؤولية كيهرب منها، كيفما كانو المسلمين فالقديم، دابا بوصنطيح كتلقاه هو الأول مرشح ، المسؤولية امانة و مقدراتش عليها لا سما و لا جبال ، و لكن بنو آدم تحملها لأنه كيفما جاء فالقرآن ظلوما جهولا.

دابا اللوائح اللي توضعوا فالعمالة و زايدين الإنتخابات ديال 25 نونبر ، كاين فيهم اللي عندو مسؤولية فشي جماعة سواء كان رئيس أو منتخب ، و مقايمش على التسيير المحلي . فشي رؤساء اللي طليتي على الجماعة اللي مترأسينها من باب الجماعة كتفوح ريحة التدبير اللاعقلاني و كثرة المشاكل .

وبلا ما نمشيو بعيد نطلو غير على الجماعة الحضرية بتازة ديالنا، المستشارين اللي زايدين فاللوائح الانتخابات التشريعية سواء على رأس الائحة أو معمرها ، مدايرين والو : الطرقات كلها حفاري، حتى إلا بغات تازة تقدم باش تحتضن شي تظاهرة فالغولف غادي ربحوها بالزربة، حيث ماعندناش غير 18 الحفرة ، تازة كلها حفاري ، و إلا طاحت شي جوج قطرات ديال الشتا، كنغرقو و خصنا الفلايك باش نقطو الجهة الآخرى من الواد – لأن الطرقان ما بقاوش عندنا – حيث القوادس مسدودين و تدبير تطهير السائل اللي تمنح للوكالة ديال الما ، زيدو على تدبير الانارة العمومية اللي تمنح للوكالة ديال الضو ، باش اللقاو المواطن ضربو الضو و هزو الما .

أما الطوبيس و حق الامتياز للي ممنوح للفوغال، الرباح ديالو كتخذ منها تازة غير فلوس الخدامة، و الباقي تنمية بركان و ووجدة .

هاذ المستشارين مقادينش يزيدو فالمداخيل ديال الجماعة و يدبرو شي مداخيل جديدة و الميزانيىة ديال 2012 اللي صوطو * سمحولي نستعمل مصطلح صوطو بلاصت صوتو لأنه أكثر دلالة * عليه فدورة أكتوبر كيوضح مزيان سياسة التقشف اللي بغا ينهجها مزوار و لكن للسف ماشي مسوقولهاش الناس ديال تازة .

المجلس ما قادش يخفف من معظلة البطالة اللي ولات تازة غارقة فيها ، نسبة الفقراء كتزاد ساعة ورا ساعة فظل غياب الدعم اللي كيكون غير من رمضان رمضان بشكارة مكتزيدش على 120 درهم و يزيد قهرة على قهرة ، و تعمدنا نطالبوهم بالحصيلة لحقاش عارفين فيها الحصلة .

المواطن ساخط ، و هما بلا حشمة و بلا حيا دارو قزديرة على وجههم و مرشحين البرلمان . مساكين بغاو يشرعو ؟؟؟ و شرعلللللوو.... دارو بحال النعامة اللي مخابيا وجها فالتراب ، السيد ما سيرش حتى قطاع فالبلدية بقاتلو غير القبة ، هاذي هي ّ ما قدوا الفيل زادوه الفيلة ّ .