سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
5 اسباب تخلي الرميد قريب بزاف من رئاسة الحكومة. موقف حزبه غادي يخليه ينسى ما قالو "ما باغيش نكون بن عرفة" ومفاوضاتو مع اخنوش غادية تكون صعب بزاف من بنكيران وها علاش
يبدو ان مصطفي الرميد وزير العدل والحريات القيادي في حزب العدالة والتنمية هو المرشح الاكثر حظا اللي يقدر يعينو الملك محمد السادس رئيسا للحكومة مكلفا بتشكيلها. الرميد عندو امتيازات كثيرة باش ياخد هاد المنصب. الملك والديوان الملكي خدم معاه هاد المدة كلها وكيعرفوه مزيان. منسوب الثقة حاضر وربما اكثر من بنكيران. ما ننساوش نهار الملك عين اول مرة بنكيران فكازا كان معاه الرميد. استقبلو وعينو وعاد استقبلهم بجوج النقطة الاخرى المهمة جدا. ايلى تعين ضروري خاصو دعم حزبو. بيان الامانة العامة للحزب البارح واضح واضح واضح. ديرو اللي بغيتو ولكن حنا حزب. يعني ان بنكيران هو الامر الناهي وغادية سلطاتو تقوى اكثر واكيد غادي يزيد ولاية اخرى على رأس الامانة العامة غير باش يردو ليه الاعتبار. علاقة بنكيران والرميد مزيانة بزاف. هاد الشي غادي يخلي الامين العام رئيس الحكومة السابق مسهل للعمل للرميد. يعني معاه الحزب وداعمو. النقطة الثالثة هو ان المنافسين اللي كتروج اسماءهم عندهم مشاكل. عزيز الرباح فيه شروط يكون رئيس حكومة غير هو بمواقفو الاخيرة خلاتو يبعد عن مركزية الحزب، ما بقاش كيف كان شاد التنظيم. بالعكس عندو مشاكل دابا مع بنكيران. هاد الشي موحالش يعينوه ولا تم تعيينو غادي الحزب يقراها قراءة خايبة. غادي يضعاف بزاف داخليا يخليه صعيب بزاف بزاف يدير خدمتو النقطة الرابعة هو سعد الدين العثماني رئيس المجلس الوطني. الصدفة خلات تسريبات كولمان عن تجسس سفير المغرب في الجزائر عليه باش كان وزير للخارجية. ما ننساوش دازت عليه بزاف فالخارجية والفترة ديالو بين كذلك محدوديتو. بان المنصب اكبر منو. يعني الثقة ما كايناش والكومبيتانس ناقص. هاد الشي غادي يخلي كفة الرميد هي اللي طالعة فهاد البيعة والشرية ديال رئاسة الحكومة. من غير هاد الاسماء غادي يكون غير "اعلان مواجهة" بين القصر والحزب". فالاخير وايلى تعين الرميد راه ما غاديش يدخل ادريس لشكر ديال الاتحاد الاشتراكي للحكومة. هاد الشرط غادي يخلي كلشي ينسى انه قال واحد النهار "انا ماشي بنعرفة". دابا كاين قرار الحزب هو اللي كيقول ليه غير قبل راك ماشي بنعرفة. التفاوض مع الرميد غادي يكون صعيب بزاف للمرشحين للالتحاق بالحكومة خاصة عزيز اخنوش رئيس التجمع الوطني للاحرار. العلاقة بيناتهم ماشي حتى لهيه والرميد محامي عارف كيف يفاوض وما باغيش يكون شيفونة يمسحو فيه اللي ما قدروش يديروه مع بنكيران. هادي هي الاصعب. تقبيلة اليد من الرميد لبنكيران فلقاء الامانة العامة البارح وبوسة اليد اللي دارها بنكيران للرميد كتعطي صورة كيف غادية تكون الامور
