تلفزيون الدلاع في 11 من شهر يونيو غادي يبدا أول مونديال ديال الكورة بالقارة السمراء والناس ديال العالم كاملين غاديين يوجهو الأنظار ديالهم نحو ملاعب جنوب إفريقيا والتلفزيونات الناقلة للمونديال سواء اللي بالفلوس أو اللي فابور وهاكا للفراجة مع ميسي و كريستاينو رونالدو و صامويل إيطو و ديدي دروغبا ومجيد بوكرة ... وأرا برع ، والخاسر في هاد القضية هي التلفزيونات اللي ما غاديش تدوز حتى شنتيفة من المونديال, ومن هاد القنوات ، القناة الأولى والقناة الثانية ، اللي غاديين غاديين يبقاو خاويين كيسوط فيهم الريح ، واحد خاينا قافز شوية عندو واحد الاقتراح للسي العرايشي و السي سليم باش يعمرو التلفزات ديالهم ومضمون هاد الاقتراح يقول بما أن القناة الأولى و القناة الثانية وباقي القنوات الأخرى اللي مشاركة معها الدم غادية تكون بيان كلاصي حيث ماغاديتش تكون فيها حرارة المونديال، علاش ما نستغلوش البرودية ديالها ونعمروها دلاع نبردو بيه شوية الصهد، المهم أننا لأول مرة غادي نعرفو بأن التلفزيون عندنا كاي يصلح لشي حاجة أشوف أمورك أستعجب من بعد مادوزات دوزيم والرياضية الديربي بين الوداد والرجاء بالعربية أو الدارجة عاوداتو قناة تمازيغت بالأمازيغية ، واحد خينا تبع الديربي في القناة اللي كيشرف عليها محمد مماد كال لينا ما في خباركمش راه الوداد ربحات في الأمازيغية بعد ماربحات الرجا في دوزيم والرياضية ، خوار عندنا هاد التلفزيون وصافي ، وطفروه حتى صحاب دوزيم والرياضية عاد غادي يطفروه صحاب الأمازيغية اللي بداو هادي شهرين ، كالو لينا غادي يستعملو 14 كاميرا وصدقناهم لكن ملي شنا الماتش بان لينا التصوير والإخراج ديالو عراسي ، وزادو فيه ملي كالو لينا بأنه بسبب الأحوال الجوية ما كدوش يستعملو داك الشي ديال أوروجوه وديال المسافة ... الحاصول ومافيه هاد الشي ما يليق ليه غير المثال المصري اللي كيكول « أسمع كلامك أصدقك أشوف أمورك أستعجب » تمازيغت أون لاين هادي شهرين تقريبا باش انطلقات قناة تمازيغت وبداو الناس كيشوفو البرامج ديالها في البرابول و داك الشي ديال التي إن تي لكن الشركة الوطنية للإذاعة والتلفزة مازال ما عترفاش بيها ، كيفاش وعلاش ؟ الله أعلم المهم أن في داك الشي اللي كيسميوه البوابة ديال الشركة الوطنية كنلقاو القناة الأولى والثالثة والرابعة والخامسة والسادسة والسابعة بالإضافة شين أنتر والإذاعة الأمازيغية والإذاعة الوطنية وإذاعة محمد السادس للقرآن الكريم ، ومازال ما كيناش القناة الأمازيغية ، واحد خينا نقز وكال لينا مالك أخويا زربان ، يا كيكول لا زربة على صلاح وكاع هادو اللي دارو في لا نترنيت طفروه ، اطلع تاكل الكرموص واحد النهار كال وزير الرياضة بأنه من حق الفراقي يوقع عقود انفرادية مع قنوات تلفزية لنقل الماتشات ديالها ومن بعد هاد الشي تافقت الوداد والرجاء باش يوقعو عقد واحد مع التلفزة اللي غادي تنقل المباريات ديالهم بجوج ، وهاد الشي ملي سمعاتو الفراقي المغربية فرحات ونشطات لكن هاد النشاط دغية طار حيث قانون العقوبات الجديد ديال الجامعة اللي غادي يدخل للتطبيق في شتنبر المقبل كتكول المادة 109 منو أن أي فريق يمنع قناة متعاقدة مع الجامعة من نقل مقابلة من مقابلاته تفرض عليه غرامة 25 مليون وتخصم من رصيده نقطة يحدث هذا رغم أن الجاري به العمل في الدول المتقدمة هو أن الفراقي هي اللي كتناقش العقود مع التلفزيون ماشي الجامعة اللي كتنوب عليها ، وفي انتظار الجديد يبقى الحال على ماهو عليه « اطلع تاكل الكرموص نزل شكون اللي كالها ليك »
