لهيداية ماوصلات وأخبار اليوم رجعات

معرفتش آش طرا ليا هاد صيمانا، وبالتحديد من نهار لعيد، حاس براسي مقادش نكتب ووقتما تنجي نفكر نكر على شي حاجة تيجيني شي صوت فودني تيقولي الله يهديك بلاش، حتى بديت نكول راه ضربني شي جن وتيدوي ليا فودنيا، جاب الله واحد الصحافي قالي تاهوا طاري ليه نفس الشي، وقالي واقيلة دعوة الناصيري وصلاتنا، حيت يلا عقلتو راه كان قال أيدعي معانا بالهداية.
الله على راحة وليت تنشوف كلشي زوين، الحكومة تادير خدمتها، وعباس الفاسي سيد الله يعمرها دار، وياسمينة بادو حاربات جايحة ديال الحلوف مزيان، وغلاب صرع ديك مدونة السير، والبطالة غير إشاعة، والتعليم تيكون أوعر تلاميذ في العالم، وناس واكلين شاربين ناعسين مرتاحين فرحانين، وشاكيب الخياري بلاصتو فعوكاشة، وقمع حرية التعبير أوعر فكرة، والمراكز المتأخرة ديال المغرب غير دول لخرين تيحسدونا وداروها لينا بلعاني، والكورة ما عندنا ما نديرو بيها، ودوباج فألعاب القوة غير قالب داروه لينا باش يفشلو لينا الركابي. المهم المغرب أجمل بلد في العالم، وفي المجرة، ولي قال لعكس الحج الجاي يدعي معاه شي وزير باش الله يهديه.
دابا خالد كدار أيبدا يرسم الحمام، وبوعشرين أيقول العام زين، أنوزلا قبل ما يذكر شي وزير أيكتب سيد الوزير المحترم جدا، أحمد زيد أيكتب على كيف تصبحين جميلة في 3 أيام، الجامعي أيبدا يكتب على الشعر الفارسي في عصر المايا، بن شمسي أيدير افتتاحية على أن العدالة والتنمية هي الحل، حيران أيتوجه لداكشي ديال الماسم والعيد لكبير، وزيد وزيد... وهادشي كامل حيت هداهم الله بسباب دعاوي الناصري فالحج.
شتو على راحة دابا، راه فلسفة العام زين متضرش، ولي بغاها المخزن هيا لي تكون، ولي قال ماع نقولو تباع، غير هاد الصحافيين الله يهديهم راسهم عاصي، كان لابدة من الدعوة ديال الناصيري باش نوليو ضريفين ومهديين؟
بلا كدوب: المتمنيات لجريدة "أخبار اليوم المغربية" عودة ميمونة إلى الساحة الإعلامية المغربية الاثنين المقبل، بعد منع طالت مدته بدون وجه حق. وأن لا تنظر هيأة تحريرها إلى الماضي لكي لا تسقط فيما يريدونها أن تسقط فيه، فالمغرب يحتاج إلى صحافته، التي لا تأبه بدعوات الهداية من وزير اتصال في الحج.