أخطر المجرمين !!

وأنا جالس قبالة شاشة التلفاز أداعب أزرار الريموت كنترول سقطت سهوا في قناتنا المحترمة دوزيم و بالضبط حلقة معادة من برنامج أخطر المجرمين...
المجرم كان شخص خفيف الحركة و رياضي، قاري و من وسط فقير، بهكذا تقديم افتتحت الحلقة التي لخصت قضية سرقة بعض اللوازم المنزلية قام بها أحد الشباب من حملة الشواهد بعدما أرهقته البطالة و قلة الشي، في البرنامج أظهرو الشاب كأنه مجرم حرب بعدما تم انتقاء كلمات التعليق الفضفاضة بشكل مبالغ فيه قصد تحقيق إثارة مجانية للبرنامج، بل الأكثر من هذا هما هاذوك لي لعبو دور رجال الأمن و خبراء الجرائم ولي زادو الطين بلة خاصة عندما قال أحدهم: باش شديناه ماكانش ساهل، المجرم كان حافظ سواريه مزيان وكان ذكي بزاف ولكن بالزربة فكينا خيوط الجريمة و حاصرنا المجرم و شديناه...
وأنا أشاهد البرنامج جاب لي الله بحالا كيهضرو على أسامة بن لادن أو صدام حسين، تهويل و تضخيم كبير للقضية، في نظري هذاك مجرم جد عادي لأنه سرق غير ما يسد به رمق بطنه بعدما أضناه البحث عن عمل دون جدوى في بلد لا يعترف بالشواهد و إنما بشكون نتا و من توسط لك؟

أخطر المجرمين ديال بصح هما هاذوك الجنرالات و الكولونيلات الكبار لي حاكمين البلاد و ناهبين خيرات الوطن، هما هادوك لي مستغلين 3500 كلم ديال البحر و مسيطيرين على رخص الاستغلال الحصري لجوج بحورة و لآبار البترول و الغاز و مناجم الفوسفاط و الزنك و الرصاص و المعادن النفيسة، قراونا في جغرافيا الثانوي أنه لا توجد المعادن النفيسة و البترول في وطن إسمه المغرب، بالفعل مكذبوش علينا هاذي حقيقة راه لا توجد في المغرب بل في أرصدتهم ببنوك سويسرا...

أخطر المجرمين ديال بصح هما هاذوك الرباعة ديال "الباطرونا" لي واكلين عرق أكتاف الآف العمال كيف واكلين الدولة في ملايير الدراهم ديال الضرائب...

أخطر المجرمين ولي يستحقو يدوزو في دوزيم هما هاذوك السياسيين و الوزراء لي كيضحكو علينا، هما هاذوك لي كلاو رزق 30 ألف شاب و شربو دمهم فيما أصبح يعرف بفضيحة النجاة، هما هاذوك لي جابو "الحمير" باش يستحمرونا، هما هاذوك لي طيلة عقود من الزمن يمارسون السياسة للاغتناء لا لإغنائنا بالقراية ديالهم في السوربون و جنيف و مونتريال على ظهر الشعب دافع الضرائب...

أخطر المجرمين هما لي كيترشحو عندنا كل انتخابات ولي البرلمان فيه بزاف منهم، هما هاذوك لي كنشوفوهم غير في الحملة الانتخابية و صباح صلاة العيد في المصلى، هاذوك يستاهلو يدوزو في أخطر المجرمين لأنهم استغلوا ثروتهم للوصول للسلطة، استغلوا سذاجة و قصر يد و عوز بعض منعدمي الضمير لي باعو لهم "كروة" فوق شعارهم الانتخابي بثمن بخس قد يعينهم على توفير أسبرين لأوجاع رأسهم التي أرهقتها وعود كاذبة لمن لقبوا بممثلي الشعب، أه بصح راهم ممثلي الشعب كيجيو كل 4 سنوات يمثلو علينا مسرحيتهم لي حفظناها و يتقمصو دور ولاد الشعب لي كل همهم يزيدو بينا لقدام و يغبرو عليا الهموم، ساعة نهار نجحو زادو بثروتهم للقدام و غبرو علينا كمامرهم...

أخطر المجرمين هما هاذوك لي في الحدود دايرين مافيات ديال التهريب الدولي للحشيش و الشيرا و القرقوبي و المازوط و السلع المهربة و البلايك المضروبة ديال الطوموبيلات، شخصيات عسكرية و مدنية نافذة لي كيستغلو علاقاتهم بشبكات ضخمة من رجال السلطة باش يسهلو ليهم مهامهم في كتامة و جوج بغال و الحدود الشرقية و سبتة و مليلية و جنوب المغرب في الحدود مع موريطانيا وحتى في البحر الذي تنشط فيه شبكات دولية يتزعمها مغاربة...

أخطر المجرمين هما النخب و مديري الإدارات و المصالح العمومية لي رجعو الإدارة بحال شي ملك خاص ديالهم، هما رؤساء الجماعات الترابية و الجامعات الرياضية و رؤساء الفرق المغربية لي دارو غزوة بدر و أحد في صناديق التسيير و في المال العام و كون غير كانو نتائج يحمرو الوجه، لا فلوس اللبن بقات لا زعطوط دار بيهم فايدة...

أخطر المجرمين هما لي شادين أخطبوط الإعلام و هاذوك جوج حلاقم و مراكز القرار لي كتدخل ليهم يوميا قيمة المانضة الشهرية مضروبة في عشرات المرات و منهم أطباء الشواهد الطبية و قضاة الضمائر المنعدمة و غيرهم...

أخطر المجرمين ببساطة هما لي كيسرقو بالقراية و العلم بلا مايخليو لاطراس، هما لي كيديرو جريمتهم بعدما هيئوا لها ترسانتها و مخرجها القانوني الذي سيخرجون منه مرفوعي الرأس بجيب مليء كما تستل الشعرة من العجين، كايبدلو القوانين و يعدلوها على أهوائهم، هاذو هما أخطر المجرمين كيسرقو بالقانون، أما هاذوك لي كيجيبوهم في دوزيم راه مافيدهم والو و بزاف عليهم الوصف...

خلاصة القول أخطر المجرمين هما هاذوك لي ماتقدر لا دوزيم لا الأولى تجبدهم، لي بنكيران براسو ماقدرش يقول أسماءهم و اكتفى فقط بإعطاء لقب التماسيح و العفاريت عليهم، الحيط القصير ديما هو لي كنقزو فوق منو أما أخطر المجرمين الحقيقين ومادمنا في المغرب فوحده الله جل و على من سيفضحهم، اما بنكيران و دوزيم باراكا عليهم غير لي سرق خبزة و صاك و محلبة و بالمناسبة صاحبنا مول الشهادة العليا و لي داز في حلقة اخطر المجرمين بتهمة سرقة بعض المستلزمات المنزلية راه ضربوه بأربع سنوات ديال الحبس أما خوتنا لي ضربو الصنادق ديال الزرقالاف راهم كايتساراو في أجمل بلد في العالم بكل حرية...