بلادي ارض بور، ما محتاجة لتراكتور بلادي ارض شهلة، بلا وردة و لا نخلة بلادي كدية و فدان، ما وزنها ميزان بلادي حبة مدروسة، و سبولتها مسيوسة بلادي رواية فكتاب، المعقول فوراقو غاب بلادي ضاوية بالليل، و غلة حرقها قنديل بلادي طير حر، ماشي حمامة صابها الضر بلادي فيها خنجر، مدهون بسم الغدر بلادي فيك التصاور كثاااار و كلها يقول انا ماشي بحالهم: هاضاضاي ضاي حنا هوما الأخيار و الباقين اشرار، شفار وقمار و فليلك يابلادي و رواح النهار تجمعهم قبة كاملين في الدوار فيها يگرگرو كيسان البلار و يعنقو اصحاب اليمين اصحاب اليسار .. الكف في الكف يعليو النوادر المحجوبة على الأبصار.. و يقولو لأهل الدوار: الصابة كلاها لهيب النار، و الكسيبة جيفة حرام تتكال سولو فقيه الدوار و البيار جحيفة، واخا كثرت الأمطار… عليكم بالتويزة و السخرة نبنيو قبة جديدة برخام و عود القماري و سدر وعرعار فيها نتناقشو وتنعاودو ياااا اهل لقبيلة كيف يمكن نريبو حيوط المقدار اللي سنين و حنا فيها عايشين الفقار اجيو نبنيو الجديد فوق البالي راه عندنا شلا فكاااار راه في القبة نتافقو و نرساو على شي قرار يزيان به العام للعوام و نهزو رايتنا و لعلام …. باراكا شبعتونا كلام باراكا كشفاتكم ليام قيلوها و خليوها راكدة ، تعودنا نصبروا على جفاها عسى نبدلو التريْبة الفاسدة و اللي زرعناه فيها عند موسم الحصاد يبان. فبلادي زينة البلدان ف " أكتوبر" الفلاحي، يگجگج هجيج الناموس و الذبان. رايج على الغلة و الخزان و النحل مسلسل بلا شهد، بلا عسل.. في جبح خالي مكسل فنعاسو زاد بسل.. حتى طال و طول و ظنوه فخلا تخول على من ياترى يعوّل على ريح جايرة تتغول وتهول .. و ذيب يغوي بكلام بالزواق متول.. اولا نعامة راسها مرمل ما سمعت نواح ولا شافت نوار مقفل و لا بلعمان مذبل. فأكتوبر الفلاحي بلاحرث بلا زرع كلشي موجد المنجل ويزبرو فراس قرع بجراح الزمان منبل و مطنجل فأكتوبر الفلاحي محال البرمة تفور بلا ماتتقفل //////// Simo Aflak
