ليعة لغدر

ياخيي يا سامع
خلييك حدايا
عطيني البال والخاطر
نترجاك رد الولهة
بجوارحك صغى لي
وعاود صغى
لصيحات طالعة تصريح
من دواخل لحشا
حاملة غيوم
جايبة حموم
وعوافي زاهر جمر
ما خلات في الذات عماد
ماخلات في الروح زاد
كلشي تلهب وعاد رماد
من ليعة لخديعة ولغدر
من ليعة طعنات في ظهر
شكون اللي كان سباب
شكون اللي قطع خوالف
خيمة لامة لحباب
ناس ظنيتهم خيرة الناس
ناس مالهم فلوفا خطوة
ولا فعين لمحبة شوفة
سرقوا مني لعمر سهوة
ڭ وبغاوا يحاسبوني عليه
سرقو مني ورد وزهر
ولا واحد فكر شي يوم
وقت الڭايلة والشوم
بميهة نقية يسقيه
يفاڭد فيه
ومن يد لمخالي يحظيه
باش يزهر من ثاني
بلوان زاهية تخبل لعياني
تريح النفس
وتزين حوشي ومكاني
في ليل شاتي رواس
ملحف بحايك لحيانة والخوف
لا ڭمرة مضوية فسماه
لانجوم سهرانة معاه
وعل ضماير غشاوة حاجبة
نوار لحقيقة والشوف
جاني رقاص مجية مزروبة
جاني رقاص بڭدام مهرودة
ونا وحيد في فراشي بلا وناس
يخبط على بابي
ولعرڭ من جبينه صباب
كلمني بصوت خافت مبحوح
لحروف منه خارجة جروح
يا مول لجنانات الفايحة
بروايح ونسايم ترد الروح
وتفاجي غمة كل مڭروح
جيتك والڭلب دامي
جيت نخبرك بلسان حامي
لهلية ولتباع ناوين بيك لغدر
تجمعوا في لخفا عند جنب البير
بلا سبة بلا موجب شرع
تڭادوا بزربة على جور لحكام
ما ڭرت فيهم عطفة
ماداروا للدم حسبة
كلمة وحدة وڭالوها
على نغمة مساوية نشدوها
ما الساڭية خسارة فيك
ما الساڭية ما يروي عراصيك
باش الغرس يذبال
وانت يركبك لهبال
وتضيع ما ضاعت وراق لخريف
ويسلبوك من حقوقك بالسيف
من كثرة الهم ضحكت
لا تحسبوها من الڭلب زهوة
راه غير سنان غدروا بي
وڭلت لحالي
اياكما عطيت وما وفيت
ولا وقت الحزة عليهم تخليت
وذكرت كلام لسلاف
واش لموالف ياخذ يدي
حينت عود نكار الخير
ڭدما يكبر يبقى سواس
كنت شاريهم بالذهب الغالي
وهما باعوني فسوق نحاس البالي
بلا تعطال بكرت عند السروية
و ڭدام جماعة ولعدول
حبست ملاكي بلا رجعية
علطيار والورد
وهل العشق والكلمة الذهبية
باش يرتاحوا ونرتاح
من وجع الراس
اللي ضامني وزاد ما بي
كالوا عسل الشهدة
وڭالو اجبح خاوي
هاذي وصية كتبتها في سطور
لا دير الخير في من ولى
تجني الشوك والبلا
نتمنى تكون ليك ولغيرك
في طريق الظلمة والديجور
الف شمعة ونور
الف شمعة ونور