سفينة لعمر

يا هاذ لعمر
فين غادي بي
يا هاذ لعمر
فين سارح بي
أنت عارف وأنا عارف
كل بدية ليها نهاية
والدنيا باللي فيها فانية
خطرة شوك
خطرة ورد
في محرك موج لبحور
سفينة لعمر جراية
شغل شطحة كفوف الميزان
تتماوج بين طلعة وهبطة
حتى يتهد صاري سفينة وقتي
وعلحفا نتجبد وحيد ونتوطى
شوف خطوط ر كَمات الزمان
تفضحها العيون كَبالة لمراية
خوذ أراسي ليام لتكَدك
فين بوك لحنين مع جدك
كندير ليك يا الساكنة في
ياك أخرتها عيطة سماوية
اش من دموع هي علخدود لهاب
وشيات من حر لبعاد ولفراق
والكون هاذ الكون
بسماه وماه
حكامو بين الكاف والنون
وسرو سطور مطمورة وراق
يا هاذ لعمر
هرى المكَدي
هرى رزامة حديد
وبدى تريب سواري
هاذ الكَسدة المنسوجة حزان
اللي رشات من واهلي رشات
وخلي الروح تسافر لبعيد
تجنوح فلعلو فوت سحاب
لسما لخلود جوار كَمرة ونجوم
ووصيتي تقليد عليك يا الغالية
طلي على قبري فرحة وعيد
ورشي ترابو بميهة لغيوم
تنور جنابو حبق وسوسان
واللي زارو من لهل ولحباب
يتفا جى غيارو بروايح نسوم
لعمر يا خيي كَد ما طال قصير
وأنت ساير تتختل لي
من زمان وأنت مبرك لي
مرة ننجي ونسلم
مرة يمكن ضربتك
تكون سباب ركَادي
حفرة وردم
يا هاذ لعمر
خايف منك
لا توفي عهدك معايا
وتخليني مفرد وسط الطريق
لا زاد
لا رفاكَة
لا وتاد
وتشعل في ركاني عوافي حريق
كَبل ما نكمل مسيرتي
كَبل ما نحكي ليعتي
المهبلاني
المتيهاني
المغرباني
في مسارب الخوف وضيق الحال
علدوام ندهسس
في فيافي مغولة غوال
لا شموع لقيت
لا وسادة عليها تكيت
وكَلت لخاطري في خاطر خاطري
هذا عشور وصروف الدنيا يا مغرور
لا تامن ليها علي وعليك تدور
كلها حلمة كذوب مغلفة قشور
كلهاحلمة بدايتها مخالب نسور
ونهايتها لحاف رقيق لونو بيض
ورمية في ركَية عبارها شبو
يونيو 2011