كذا من قبة اتزار.. ومولاها في النار

كذا من قبة اتزار
ومولاها في النار
الغُنَّة عاللّي بايَتْ بلا عشا
فِ فَمْ السبع غذاتو ،
المعنى عاللي بين البساطل والمحنشة
بين ألف ليلة وليلة زهواتو .
واحد بلا خدمة
لاخر ما يحطش يدو ف الما .
ڤلبي على اللي ولّى نمرة ، وسدُّو عليه
لاخر ، ابواب الدنيا كلها مفتوحة ليه
واحد عايش نهار بنهار
النهار اللي داز يڤول عليه فلتة
لاخر جاياه الصابة
ما عرف فيها لا درسة لا حرثة
تخمامي فاللي بايتين تحت القطرة ،
لاخر طالق الخيط برا ،
واحد لڤى دواه ف الحضرة
بالحفا مسري فالسمرة ،
وحدين مردومين ف حُفْرة
لاخر بفلوسو ، دار الناس ڤنطرة . يا السايل : هاد الضباب ، حتى لاين ؟
علْ الضحك ، لاش قل
والهمْ علْ لوجوه باين ؟
نواجبك :
التخمام ف القلوب ، احتل ،
الخير كثير، وشي ماكاين
شي يديرها ، وشي يوحل ،
واحد قضى الغرض ، خف من تيتْسْويتْ
لاخُرْ شكى ، ڤالو ليه ، اوقَفْ تْساين
هذا سابقك ،
وخّا جا مْعطّل .
نواجبك :
الغمزة قياس الحُرْ
وحنا ولفونا الدّبْزة
قرّاونا الدوا هو الصبر،
وعرفكم يبقى قبل الهمزة
راكبين سفينة امواجها صخر ،
والظلام قفز
قفلو ف كنز
محروس في قاع البحر ،
والزلط واقف يمتحن
كيّت اللي غلط واعتر
زوبية المعيشة مخطاف
العود ميت ، والحداد بارك يسمّر .
نواجبك :
زماننا كثر فيه التبعبيع
ما طالعة فيه غير غير اللي ڤال : باع
والبرَّاحة يشنعو عليه ولد القاع والباع ،
شلة شبابية بشواهدها
گالسة تبردي لوقت
حاطين عليهم بالتدلاع
ودياول السكاول يلعبوهم التطواع ،
واللي فتش على خبيزة
يڤولو ليه : بوجادي ، سير اعطينا التيساع .
ساوي آلبوهالي ساوي
را البِّيبَّل محيراه الدعاوي
ماحيلتو للغلا ، ما حيلتو للرشاوي
تلفاتو لوانات ، واللغا الخاوي
هالفنيدي هالعكري، هالكاموني، ها السماوي
والكْراسة تبوَّق حتى امّالين لعراوي
وحدين مرحين ومفايجطين بين الشهاوي
ووحدين بين الزلط والڤحط عرڤهم لاوي
لاخر عندو فيرمة ڤد الخريطة
وقبيلة كاملة تْكامش على شْبَرْ د الْما
يڤولو كلنا خاوة - آش كاين ما تخاوي ؟
ساوي آلبوهالي ساوي
وفكّرْ آش يفرق واش يخاوي ؟
واش مول لڤدم المشَّڤ بحال مول الخد الراوي ؟
بحال مول الخد الراوي ؟
وڤل لي واش دابا نفعلو ،
وغادي نتركو ،
تداوي ؟
را الدفا عجب شي گنس
واللي مكسورة خاطرو يجبّر بالكاوي
واجبتك ، اعطيني خو كلامي .
كلشي زاز .. كلشي زاز
ساعتنا ما محقّاشْ
مارتنا ما مڤادَّاش
احنا وحيدة والسياسة لاش
كانت لَعْمارة ما مساوياش
واليوم الدَّقَّة متاوية بلاش
عاش الوطن عاش
هذا مقوس .. هذا راش
هذا مقصر مع الحناش
وكلشي زاز ..كلشي زاز
ما نڤوليكش: كلامك ماشي على فصالتي ..
كلشي داروه
ما بقى غير حشومة واتفر،
بغاوك عبد حرطاني
ويڤولو عليك ازفر،
يتعترو ف جلايلهم
يتبحلسو لبنادم الزعر ،
واحد بالقناطر حسابو اعمر
وقبيلة كاملة جيوبها تصفّر
ما لاڤية ما تحنجر .
واحد من دابا لبلاصتو فالانتخابات راشم
واحد على بلاصتو قارم
لاخر كمّش بزقة ، يحساب ليه فلس
عليها كارم
بغاوك تڤول كلشي مليح
إيلا بغيتي تكون سالم
(ڤلت شي احزاب شدّات لانْتْرِيتْ
أو شغل الفارة هذا
ڤالو : أنت تفتش على خزيت(
كلشي باغيك للخط تروم
واحد باش يطلع دارك سلوم
لاخر زاهي باشر لعُلُوم
وأنت تخمامك دار لك بوزلُّوم
كِيلا حايحة نايضة وأنت ف الدوم
إيلا قبلت – معاهم – التوِيزَة تلقاك مخدوم
وإيلا عكّسْتِ ، فين مشيتِ تلقاك مرشوم .
ساوي آ البوهالي وترتنا،
ومد يدك لقاع الخابية
كلامنا تسدّا ، ومَعْنْتُو منْجَجْ
وقبل ما تقسَّس
بُخْ ورُشْ .
شي كلب ملّلي يحس بشي همزة ودنو تقلّش
وعليها شي وحدين فضلو العمى عَ لعمشْ
كِ شِي دالية ، تسقات وبدات تعرّش
سارحة ، وخّ الطريق بالگنايز مفرّش
جاب لي الله بحال إيلا لرض غادية وتكمّش
عليها .. المسكين بحال الصّم
اللي جا .. به يتْيَمَّم
وهو يسُوطْ ويتْفش
وشي واحد ، تڤول ، هذا شهرو بقوّة ما تكرّش
دوك اللي عطاوك الكلمة
يلعبو معاك كاش كاش
إيلا قولبوك
تڤول أنا عايق بهاذ لفلاش
إيلا شفت واحد صبّت عليه الدنيا
وڤلت : مناش
يڤولو عليك أنت مكروه ، ما تسواش .
اقْوَى السْكُبِّي
وكيف يدير زواق الكلام حتى يمحي الطَّاش
ڤالو: حزمو السمطَة
ڤلنا : واللي كان ؟
ڤالو : مشى
ڤلنا : وُفاش ؟
وجْبْتي درتها ، والكلام بيع ومقال
بالحق ، عشيركْ ما تدوزوش
نواجبك :
ادَّمصو اللي كانو نيف وگاشوش
العيب في شي وحدين ڤالو وما داروش
المراح مشطب ومرشوش
الڤعدة فيه خاصها بلان ،
صيفطت الدراري للڤاعة
جابو لك اخبار الفدّان ،
ادّاه كبير الجماعة
ڤلت : نقيد به الدعوة
تفيَّك ، وجبد لبلان.
ڤال لك : القضية في الشاكوش
مشى وجى ، بحال إيلا كيلعب سَبْسَبّوتْ ،
ڤال لك :
عظامك تحت سناني كِ التوت
إيلا ما قبلتِ تبيع
نڤول ليهم دوزو فيها طريق لارّوت .
فهمت أنت باللي اللعيبة ف الجْعِيبة ،
عرفت باللي الحق صوباتو ليه التقرقيبة،
هو معاه مدفع،
وأنت باغي تتبورد ب ڤصيبة .
حط يدو على ڤفاك
وأنت عارف ،
اللي شدك من ڤفاك،
بحال إيلا تخطّاكْ .
والقاري اللي ڤال لك: مول الحق ما يضيع
وماشي بزز منك تبيع
شفته ، بقى كيدور
بين الجماعة وتّلّى اللور
ڤلت : المْفانّة اوْقر
والسكات من الغدر ،
الحساب صابون
والصبر كيدْبر ،
بيناتنا القانون
ڤالو لك : شاب وتقهر،
ولاو يْفَصْلو ليه
وإيلا انطق بالحق
يڤولو ف السر.
ڤالت الجماعة : كل شْتا وليه ربيعو
واللي شْراك بغاك تطيعو
ما تنساش الغرس ، قبل مارس زريعو
واللي عطى خدّو را لْما رفدو
ڤال كبيرهم :
اللي وصل منخرو يعضو
عندي طابع المخنز ( المخزن )
وانت ...الدبانة بدات ف راسك تزنزن .
هزك الحال
مشطة و ڤدم ،
شحمة مفرشخة ف الدم ،
اسلخ وادفن واردم
كلهم عارفين وضاربين الطّمْ .
ها كلامك صرفتو عقيق وموزونة
آتيني بشي دكَّة مْهَنْدبَة
ف قاع الكاس مدفونة ،
أو واحد دم الكلب
دمعتو على خد الكاس مدردبة
من بعد واحد السڤطة منغومة .
هاك واعرف من جاك
اعرف خاك
هو من أتاك ، ماشي اللي والاك .
خليني من واحد عَوَّام ف جرف عالي ،
آحيانا على اللي ما عندو لا تالي لا والي .
ڤالو : غرّق الجرح
لا بد من الصلح
والصلح فيه الربح ،
لعدو تجبَّر،
احنا مكفيّين
وهو فينا يْطَحْطح .
انبت ف الحطة
بحال مرض الحي
و ڤال : هذا مراحي ،
واحنا ؟
نخطبو ، ونشخرو، ونضربو الڤُبَّاحي .
تناتفو يا اللي الزيروات ، شواشيكم ،
زبرو زيتون حيفا
باش ترضى لالَّة ماريكان عليكم .
بالحق ، كلشي بان
ف زمان العربيكان
العمامة المعَكرة عافطة علينا
ملّي نْفَنْفنو ، تڤول :
السفيه يقرا ما فيه ،
راني مريضة وما ڤادة ،
وإيلا عيّط عزيزي ريگان
نوضوني ليه .
ڤل لي :
واش هذو عرب ؟
عرب الكتاب
ولا عرب التراب ؟
نواجبك :
اشهد يا زمان
العرْبي يحفر لخوه
باش يفرح البرَّاني
الماضي ردموه
بشي دراهم كلشي تَّمسح
العقد اللي بِنّا رهنوه
واللي برَّزناه ، لقيناه مسطرح
اشهد يا عَلاَمْ
اشحال من صراط ف طريقي
زوابي من كل جيه
لعدا ، يتسناو حريقي
وخوتي زايدين فيه .
بالحق كلشي بان
ف زمن العَرَمِيكان .
......
......
أَخَّرْتها :
اللي ف الشرق ، حابض ڤدام لعْدا
وُورا خوه سخون ،
واللي ف الغرب ، ليلة الغلطة واللبدة
عند صندوق التابعة مرهون .
1987
أحمد لمسيح