ثاراوين هزو مغنوج ضربو بنتهامي و ثمازيغت سباب كلشي

راه لعشاء الزين باين من العاصر، من النهار الأول قلنا لكم هاد مهرجان ثاراوين متماش ماشي على شي حاجة، مع كامل إحتراماتي لناس اللي في المكتب ديال المؤسسة المتوسطية للثقافة الأمازيغية بالناظور و خصوصا واحد الربعة اللي معرفتش أش وقع لهم و دخلو فهاد المؤسسة اللي كان باين فيها ريحة لعفونية، و لكن راه مزيان وقفوا على الصح و قدموا الإستقالة ديالهم و هم محمد بوزكو بصفته أمينا للمال، السيد ماسين جمال زبيري بصفته نائب ثاني للرئيسة، السيد محمد نضراني بصفته نائب أمين المال والسيد بنعيسى المستيري بصفته نائب الكاتب العام، و باقي تما شي إسم و لا جوج اللي خص تا هما يزربو و يحطو الإستقالة ديالهم و لا غا يوليو من المغضوب عليهم. هاد المهرجان كما قلنا من نهار الأول باين فيه تامخزانيت، محيت اللي تكلفات به هي ليلى أحكيم ،هاد الإسم لي كان مجهول قبل الإستحقاقات الإنتخابية ديال 2009 ، و لي فشلات باش تحصل على مكان متقدم فاللائحة ديال الأصالة والمعاصرة فالناظور، و لي زربات عليها أمينة شوعة فيها ،و خلاتها تلجأ للائحة ديال مكنيف العجيب، لي اكتسحات فيها، و كلفوها الشلاهبية باللجنة الثقافية فالبلدية لي حاولات بالمجهودات ديالها باش دير أنشطة، و تحرك الشأن الثقافي لي كان ميت فالناظور ولكن فالأخير طبزات لمها العين و عوض ما التفراج إكون فالمهرجان و لات لفراجة فيها. هاد المؤسسة ما بقا لنا غير نديرو لها الجنازة و نمشيو ندفنوها و السبب هو السي بنتهامي الأمازيغي الكاره للأمازيغة، إيه العامل دالناظور ضد كل ما هو أمازيغي و تنكر من بني جلدته، هادشي تأكد في الإجتماع اللي دارو مع المكتب ديال المؤسسة المتوسطية للثقافة الأمازيغية حيث قالهم إما حذف إسم الأمازيغة من الإسم ديال المؤسسة و لا نديرو جمعية جديدة تكلف بالمهرجان و بالفعل هادشي اللي وقع دارو جمعية جديدة و الرئيس ديلها هو أحمد المغنوجي و الكاتب العام هو سعيد البركاني أما أعضاء المؤسسة كاين اللي قدم الإستقالة و كاين اللي مشا الجمعية الجديدة، أما الفرماسيانة ليلى أحكيم ضرباتها بطم و ما صرحت لحد الساعة بحتى كلمة.
المهم من هادشي ثاروين هزو المغنوجي ضربو بنتهامي و ثمازيعت سباب كلشي، و بنت المخزن ولاتك تخزن من الشوهة.