لامان قبل الكوميرا

دبا الواحد إلا بغآ يمشي اتقدّا من السوق خس إهز معاه بطبيعة الحال بزطام عامر فلوس خاصّة مع الارتفاع المهول لأسعار المواد الغذائية الأكثر استهلاكا من قبل الأغلبية الساحقة من المغاربة، أمخسّوش ينسى واحد الحاجة أهم من لفلوس دبا الفلوس مكفيينش باش اخرج الواحد سلامات من أسواقنا تخاف مع هاد الشّفّارة ألّي كترو يخرج مسكين مهزوز فوق شي محمل بحال ديك الخضرة ألّي كان ناوي اهزها ف الكفة، خس يبقى إهز معاه زرواطة، وإلا كان مدوّر الحركة يشري شي كلب ديال بيتبول ويدّيه معاه باش يحمي راسو مزيان، وخّا وزير الداخلية دار واحد المذكرة يمنع تملك هاد لكلاب ، لحقاش الا ماشو حتى عضو شي واحد الله يستر مشا خسارة ولكن الله غالب راه كيقولو الضرورات تبيح المحظورات أولا؟ !! وإلا كان مندوك شخاشخ إدّي معاه شي جوج سيكريتي واحد للبزطام وواحد ليه وطلب الله واش اسلكو حتى هما! المهم واشنو نقولكم لارواس ديال الشفرة والمنحرفين والخارجين على القانون! ""
لوجادة مثلا عاقلين على داك المقرقب ألّي بدا يقطع فولاد عباد الله بالسيف ديالو فسوق الجزارة ف ألفين وسبعة بحال إلا كان فشي معركة ديال أيام الجاهلية. وبنوليه الناس كي الدبان والبخوش!
من هادي شي 4 سنين وجدة والات فشي شكل، الناس مبقاتش تيق تخرج بليل وتخاف من قطاع الطرق الذين يقطعون عليهم الطريق جهارا نهارا فبالأحرى ليلا! شي أحياء ولات مناطق محظورة على غير ساكنيها حتى البوليس ميقدش إدخلها، يعني بالصراحة الواضحة البوليس مبقاتش عندو السيطرة على هاد الأحياء!
واحد نهار أسّي عبد الله بلحفيظ والي امن وجدة قال فواحد الحوار ديالو مع واحد الجريدة حزبية " بان الحالة الأمنية ديال وجدة جد مستقرة ومتحكم فيها، وان كل ما يروج من استفحال السرقات والخطف والعنف بالأسواق والأحياء مبالغ فيه" الله يلعن الشيطان أسي بلحفيظ واش راحنا فوجدة والا فستراسبورغ ؟!
من قبل أسّي بلحفيظ مثلا كانو تلامذنا يخرجو من المداريس والاعداديات وحتى الثانويات بلا ميمشيو عندهم والديهم مع 6 ديال لعشية باش اديوهم معاهم، دبا سير تشوف المؤسسات العمومية ديال التعليم مع 6 ديال العشية كتكون الأبواب ديالها متكدسة بأولياء الأمور ينتظرون فلذات أكبادهم درءا لأخطار اللصوص المحدقة بهم،وحتى محيط الجامعة كاين هاد أشي خاصة بعدما والو الأفارقة كيد يرو ما عليهم حتى هما!
وهادي واحد شهرين تقريبا وقعات واحد لفضيحة بحي هكو تصورو شي 20 دار تعرضت للسرقة في ظرف شي شهر والبوليس مشد العصابة حتى كان الحي كلو غادي يتسرق كاين شي دليل كتر من هذا على إن الإستراتيجية الأمنية ديال لمدينة مصالحاش وخس تبدل هذا طبعا ان كانت هناك إستراتيجية أصلا!
شي وحدين الله يسمح ليهم كيقولو بلي الإستراتيجية الامنية ناجحة والدعوة زينة والدليل ديالهم مثلا هي مباريات المولودية الوجدية بالملعب الشرفي كيقولو والعهدة عليهم بان الجمهور مكيديرش الشغب والامن ضابط امورو فالتيران،او شوفو شحال زوينة هاد كلمة ضابط!
اولا كلشي كيعرف بلي البوليس الي والا يدخل للمباريات ديال المولودية الله اعلم كيكن كتر من الجمهور لحقاش الجمهور هجرو التيران بعد الفشل الذريع ديال المسؤولين في مكتب الفريق على امتاعه( الجمهور) واصبحت المولودية تحصد الهزيمة تلو الاخرى، ثانيا راه على حساب داك اشي الي تقال فالصحافة راه الجريمة ارتافعات فالمدينة حسب تقرير ديال الادارة العامة ديال الامن وهنا الواحد يفهم حاجة وحدة ان الاستراتيجية الامنية من جديد خسها تغير!
والا كانت الاستراتيجية الامنية كيقصدو بها شي وحدين المقاربة الامنية فهنا كلام اخر فعلا كاين شيبوليس الا طاح بين يديهم شي مواطن شافو انو دار شي مخالفة راه غادي اشبعوه زرواطة كيما وقع مع داك المواطن هادي واحد السيمنة تقريبا الي شت الفيديو ديالو شدوه شي 3 يال البوليس وشي 3 بحالهم ديال المخازنية من جهة باب سيدي عبد الوهاب، وكل واحد منين اشنشن فيه ومنبعد اداوه لبوسط ديال البوليس الي من جهت ف د ش!
الاستراتيجية الامنية الي بغينها فالحقيقة هي ديك الاستراتيجية الي كتخلي المواطن يتمشى وهو راضي على البوليسي ماشي ديك الاستراتيجية الي تخلي المواطن يتمشى ويفانتي من خيالو خس يتشركو فيها البوليس ويتوعاو مزيان بلي هاد العصر الي كنعشو فيه عصر جديد.
باش مننساوش واحد الحاجة والي ربما كتخلي شي بوليس مكيديروش الواجب ديالهم على احسن وجه هو انتقامهم ربما من شي تصرفات كيقولو عليها ماشي عادلة خاصة في توزيع اماكن العمل راه شي وحدين مساكن كيطيبوهم غي بالوقاف فالمدارات والطرق الشمش فيهم والشتا عليهم وشي وحدين غير ادورو بسطافيتات! وخس تكون شوية ديال العدالة فساعات العمل!