صفحات من الزجل العتابي(أش نقول)

صفحات من الزجل العتابي....(أش نقول)
أش نقول
ما بقى ما يتقال
ما بقت نية
ما بقى معقول
كثرت لهوال
ف هاد الزمان
كلشي مشغول
بنادم مجلي
مزعوج البال
بنادم طماع
بنادم غول
داتو حملة
صاكتو موجة لهبال
أش نقول
يا مالين الحال
كية الدرويش
لي عايش مهمول
طول حياتو
مخبي
موضر بين الأطلال
مطعون بخناجر
مقتول
لا صحة بقت لو
ولا راسمال
يبكي ويقول
مالي ومال حياتي
مخبلة تخبال
يبكي وينوح
هو المدلول
هو لي
لعبت عليه لحوال
يبكي وينادي
"واه مالي مجهول"
مدفون حي
وحقي لمطوه لغوال
مسكين غداه
بيصارة د الفول
وعشاه عديسة
وشوية
د بودنجال
يحك ف جنابو
وفمو محلول
يضل يجري
ويجاري
حرفتو حمال
عركان
والريق ناشف محتول
عطشان
فيه لهفة
الماء الصافي
وتغزاز لكبال
عيان مدهشر
مدهول
مخبوط ف قنت
يحلم
بالدويرة والمال
عيا ما يفكر
ما صاب حلول
بقاو فيه أولادو
ومراتو
مولاة الخال
لازم يصبر
والصبر مرسول
يكابر ويجيب
لقمة لحلال
حسن لو من مال
يخليه مدلول
الدنيا فايتة
راها فايتة
ما يدوم حال.......
الزجال المبدع: عبد الرحيم يونس
أسعد الله أوقاتكم بألف خير