* ابراهيم كيفاش داز المنتدى ديالك؟ ** بخير وعلى خير،بابا قال ليا فاش سالينا تبارك الله عليك أولدي كنتي ونتا الوليدات صحابك فالمستوى * ممتاز، وشنو ناقشتو هاد العام معا التيسير ديال مولانا؟ ** بابا قال ليا نناقشو أزمة الشرق الأوسط، هي اللي ماكتسالاش، ديما كتلقا سبحان الله شي واحد باغي يقول عليها شي حاجة. * والعام الجاي شنو غاديين تناقشو؟ ** بابا قال ليا نناقشو عاودتني أزمة الشرق الأوسط حتى نحفضوها، عاد ندوزو نناقشو عاودتني أزمة الشرق الوسط حتى نحفضوها، عاد ندوزو نناقشو شي قضية خرى. * مزيان، وباباك ماقاليكش تناقش شي نهار قضية الصحرا اللي أهم لينا من هاد الشي كامل؟ ** فالحقيقة باب قال ليا راه لقا الحل ديال قضية الصحرا غير باقي مخبعو عندو فالجيب على ما يجي الوقت المناسب ويجبدو * شنو هو؟ ** الحل ديال قضية الصحرا.شنو يسحاب ليك؟ * لا والو، ونتا ماعندكش شي حل صغيور قدك هاكدا لهاد القضية؟ ** عندي ولكن بابا قال ليا ماتقول لحتى شي واحد راهم غاديين ينقلو منك وهو ما ينجحو ونتا تسقط المسخوط عاودتني * علاش؟ مازال كتقرا؟ ** مازال مادخلت للمدرسة. أنا اني باقي صغيور على الشي كامل، غير بابا الله يهديه وصافي: غصبني فالمراهقة ديالي ودابا كيغصبني فشبابي، فعواض معواض مايخليني نتبع الدريات فالشارع، كيدير ليا المؤتمرات وتيقول ليا" خصك تولي وزير الخارجية من بعدي" حرام عليه. واللهيلا حرام حرام. غادي نمشي للفيسبوك نفوج شوية ونرجع صافي؟
