لي بغا يخرق القانون او ينصب كيهز صورة الملك او يصاوب جمعية من دوك الجمعيات لي كيتناسلوا بحال قنيات ها الشباب الملكي ها حماة العرش واش كاين شي عرش كيحميوه جمعيات اللايفات وعطيني ولا نبكي للعرش رب يحميه وماواقفش على النصابة وللحاسة راه غير كيشوهو بصورتو

إلى بانت ليك في الطريق شي فارگونيط مولاها معمرها بتصاور الملك عرفو راه خطاف والى كانو تصاور الملك كثار وكبار بزاف عرفو خطاف ومعندوش لوراق من لفوق، والى شفتي شي واحد داير فيها جمهوي مفرط في حبه للوطن مسمي الجمعية ديالو شي سمية عندها علاقة بالملكية والعرش الملكي والاسرة العلوية ، وفين مايبان فشي فيديو يكونوا عرام ديال الرايات تصاور الملك دايرين بيه عرفو نصاب وراه دايرها خدمة ومابيه لا حب الوطن ولا الملك ونهار تنوض شي حرب او شي كارثة وتحتاجو البلاد تلقاه هو اللول هارب منها والى بقا غادي يكون شكام ديال العدو .
الى شفتي شي طريبورتور مصفح بحال الى غادي للحرب، ومعلق صورة الملك كبيرة عرفو راه تورقة، وفي الغالب بالع واحتمال كبير تدير معاه كسيدة الى قربتي عندو ، وراه عبارة على خطر متنقل ، لدرجة صورة الملك بحال الى ولات غطاء شرعي على مخالفة القانون، مجرم مزبلها جرائم حكمو عليه بشي عشر سنين كتلقى عائلتو هازين تصويرة الملك وواقفين قبالة المحكمة دايرين لايف وأول جملة هي عاش الملك وبغينا سيدنا يتدخل ياخد لينا حقنا ولدنا درويش، وهو كتلقى هاديك الشدة العاشرة عندو ، فين مايكون شي واحد داير كروصة كيبيع كاسكروطات وحتطها في الشوكة ديال شي شارع حيوي كيعمرها رايات وتصويرة الملك باش يميك عليه القايد والمخازنية.
الموشكيل هو المخزن والدولة والقصر ومنعرف شكون آخر طالقين اللعب لهادشي، مثلا واحد داخل للولاية باغي وصل تأسيس الجمعية شنو مسميها حماة العرش أو الشباب الملكي أو محبي الاسرة العلوية بحال هادو ماخاصش يتعطاهم لا وصل لا حتى يعمرو معاهم السو، جمعية حماة العرش والدفاع على حقوق الانسان آشنو غادي يكون دورها بالسلامة والعافية، واش غادي تعوض الجيش والدرك والشعب والأجهزة لي كتمثل الدولة وكتحميها هادي قرون غادي يعوضها واحد باغي يتشارك مع المخزن في السلطة باسم حماة العرش، واش كاين شي عرش كيتحمى بالجمعيات واللايفات والفيديوات والاسترزاق، الجدارمية دايز من حداهم واحد مغطي الطوموبيل كلها بتصاور الملك راه خاص يوقفوه في الباراج ويحيدهم لاش هاداك استغلال صورة الملك في أي حاجة، خاص الدولة تحمي صورة الملك من المستغلين لي كيشوهوها حتى ولات ذريعة لخرق القانون وحتى دوك الجمعيات لي كيتناسلوا بحال قنيات ها الشباب الملكي ها حماة العرش واش كاين شي عرش كيحميوه جمعيات اللايفات وعطيني ولا نبكي للعرش رب يحميه وماواقفش على النصابة وللحاسة راه غير كيشوهو بصورتو.