مغربنا الغريب. كيفاش فريق طبي مشى يقلب عائلة اول واحد تصاب ب”كورونا فيروس” ودارو ليهم اتاي وبركو يشربوه – تصاور

صور عبثية غريبة بحال عبثية مشهد هادوك اللي مشاو لصبيطار مولاي يوسف فكازا فاش سمعو باللي كاين واحد فيه “كورونا فيروس” بحال عبثية مشهد هادوك اللي دارو فيديو فرحانين حقاش وصلنا “كورونا فيروس”. هاد الصور ديال الفريق الطبي اللي مشى عند عائلة صاحبنا اللي جا من برگامو من الطاليان ولقاو فيه “كورونا فيروس”. صور لناس بكمايمهم بماسكاتهم بكسوتهم البيضا مع مواطنين بحال اي منطقة فالمغرب ما دارين والو. اكثر من هاد الشي دارو ليهم اتاي. الصورة فيه واحد او وحدة من الفريق الطبي بكسوتها بنظاظرها بماسكها مريحة كتسنى تشرب اتاي.
غاديين تقولو راه قلبوهم ما لقاوش عندهم اعراض كورونا فيروس اللي هي تقريبا اعراض البرد. ارتفاع درجة الحرارة والتبوريشة… لكن كاينات حالات ما كتبانش عليها الاعراض. الفيروس كياخد وقتو.
دابا واش هاد الفريق باش رجع وبعد ما شرب اتاي واش دارو ليه تيست يشوفو واش فيه كورونا فيروس ولا اللا.
الطبيعي الى كان الولد اللي لقاو فيه كورونا فيروس تلاقى مع عائلتو هو يعزلوهم لفترة ويراقبوهم وما يخليو حد يقرب منهم. لكن باش الفريق الطبي شرب اتاي ما بقات هدرة.
الدولة خاصها تحمي لعروبيات ولسواق. ما تخلي حد مشكوك فيه يقرب منهم. ايلى وصل الفيروس قودناها.