أمل وبكا وانهيار.. عائلة الحيداوي واللي معهم عاشو لحظات صعيبة فمحكمة كازا والعماري دخل ما خرج

عاشت عائلة البرلماني محمد الحيداوي رئيس أولمبيك آسفي اللي تضرب بعام ونص ديال الحبس، فقضية التلاعب بتذاكر مونديال قطر، أجواء صعيبة خلال جلسة المحاكمة ديالو والنطق بالحكم عليه فالمحكمة الابتدائية بكازا.
عائلة محمد الحيداوي اللي جات للمحكمة الابتدائية الزجرية بالدار البيضاء، عاشت سيناريو صعيب من الانتظار لساعات طويلة داخل قاعة المحكمة او فالممرات ديالها، لحظات من الترقب ديال مراتو والأبناء ديالو وحتى المتعاطفين معاه، كاين فيهم اللي جا من مدينة أسفي، بالإضافة إلى شي وحدين منتمين لجمعيات ديال محاربة السرطان وغيرها اللي كيفورني عليهم الحيداوي.
ترقب وتشويق، أمل وصدمة وبكا وحسرة... كلها مشاعر مختلطة عاشتها عائلة محمد الحيداوي، وكان انهيارهم كبير ملي هيئة القضاء علنات الحكم للي كيدينو بعام ونص فقضية التلاعب بتذاكر مونديال قطر، حيث أغلب الحاضرين فالمحكمة واخا كانوا خايفين من أنه يتشد، ولكن راه حتى واحد ما كان يتسنى يتحكم عليه بهاد المدة د الحبس.
أما بالنسبة لصحافي راديو مارس عادل العمري، اللي تحكم عليه فنفس القضية بمدة 10 أشهر ديال الحبس نافذة، فراه كان متابع قبل الجلسة الأخيرة فحالة سراح، وكان كيبان مرتاح وهو فالمحكمة ووسط الجلسة، قبل ما يتم صدور الحكم فحقو.