واش مدينة فاس كتسيرها عصابة إجرامية كيفاش كل نهار كاين خبار على نواب العمدة الفايق والبصيري واحد راه في الحبس ولاخر ممنوع يسافر واش العمدة البقالي مكانش عارفهم فاش ختار النواب ديالو على شكل عصابة ولد مسعودة

حنا دولة ديمقراطية الشعب يحكم نفسه بنفسه بواسطة منتخبين عنه، ولكن كيفاش اخاي هاد الشعب مصوت على واحد بحال رشيد الفايق داير نصف الجرائم لي مذكورين في القانون الجنائي، من تكوين عصابة التزوير للاغتصاب وزيد وزيد، كيفاش انه كان كينجح كل مرة وكيفاش هاد المواطنين كانوا يصوتوا عليه وهو معروف امبراطور ولاد الطيب مستحيل تطلع شي حيط بلا خبارو، وكولشي كيتشكى منو وكيخاف من البطش ديالو ومع ذلك فاش كيكونوا هاد المواطنين بينهم وبين راسهم معزولين في غرفة الاقتراع مكيشوفهم تاواحد ومع ذلك رافضين أنهم يغيرو واقعهم او يصوتوا ضد لي كيتشكاو منو فاش تشد، وكيلوحو الورقة عليه، واش زعمة هو أقل المنتخبين فسادا وسط الخيارات لي كاينة هادي موحال خاصو يكون ترشح ضد الحاج تابت وشوف تشوف.
لبارح في نهار واحد في نفس الساعة تقريبا كنقرى جوج اخبار في موقع گود على نواب عمدة فاس، خبار حول ضحية الاغتصاب المفترضة للفايق وتحت منها خبار على البصيري والفساد لي داير وساعتو لي قربات، تاكيفاش هادو عصابة إجرامية كانت تسير مدينة فاس وغادا تزيد بيه للقدام ويمشيو للبرلمان يصوتوا على القوانين وهوما بحالهم بحال ولد مسعودة آشمن قوانين غادي يناقشو وعلى أي مواطنين غادي يدافعوا وهوما مخلاو قانون مخرقوهش ومخلاو مواطن منهبوش ليه حقو او بتزوه.
راه خاص أي مواطن صوت على مرشح تشد بالفساد يمنعوه من التصويت لبقية حياته، أي مرشح فاسد وصل للبرلمان ولعمادة المدينة راه هاديك غير نتيجة واحد العشرين عام ديال الفساد من قبل، وكيكون معروف عند كولشي وباين لأي واحد انه فاسد غير كيبقى غادي وكيتطور من فاسد صغير كمستشار جماعي مثلا لفاسد كبير كبرلماني ومسؤول كبير، راه سنوات من عمر البلاد كتضيع هاديك ، هاهي مثلا ولاد الطيب عاصمة الفايق عوض تكون مدينة صغيرة بكل المرافق ديالها جات على طريق رئيسية وطريق مطار فاس سايس ، راها باقا عبارة على دوار عشوائي معندو لا ساس لا راس مافيهش حتى ثانوية فين يقراو ولادهم كيسافروا كل نهار لمدينة فاس باش يقراو بينما دواور في راس الجبل عندهم ثانوية، الطوبيس لي كيوصل عندهم ديما خاسر واقف جنب الطريق ومكافيش نص نهار من المدينة للولاد الطيب وهادشي شكون مسؤول عليه من غير المواطن لي كل مرة كيمشي بجري يحطها على الفايق والبصيري ومن على شاكلتهم ويرجع فرحان.