جواد المرحوم لي مكيرحم لا مشردات لا مريضات عقليا لا سكان جنان الورد لي مافيه حتى وردة هو مثال لأعطاب الديمقراطية، وكيفاش أن الشعب فاش كيختار لراسو ممثلين عنه ماشي بالضرورة كيختار لي صالحين بل كيعزل أكثرهم فسادا وإجراما

كاين شي منتخبين ديمقراطيا في هاد فاس خاص يدارو عليهم وثائقيات في نيتفليكس، على شنو الفرق مثلا بين جواد المرحوم النائب الأول لرئيس مقاطعة جنان الورد وبين الصحفي البريطاني السفاح جيمي سافيل لي دارو عليه وثائقي في نيتفليكس كاين كيتطوع في السبيطارات وجمعيات الرعاية باش يغتاصب النزلاء، جواد المرحوم حتى هو واحد المرة الملك كان حاي لفاس نلضو جمعو المشردين داوهم لشي مركز إيواء من البين الجمعيات التي تسرف عليه وحدة فيها هاد جواد المرحوم ناض ختار ليه مشردة حمقة وبقا يغتاصبها وكانت متهمة أخرى كتوجدها ليه وهو كيبقى يتسركل بيها بالليل، تشد في هاد المونتيف وتم الحكم عليه بخمس سنوات في الابتدائي وخدا برائة في الاستناف يا سبحان الله وفي النقض ردوليه الخمس سنين.
شهور قليلة من بعد الحكم عليه في محكمة النقض بالسجن النافذ خمس سنوات آشنو غادي يدير سي جواد المرحوم لي مكيرحم حد قي مقاطعة جنان الورد تشد عاوتاني بالابتزاز شد من عند واحد مليون ونص على ود رخصة السكن، طبعا هادي غير لي تشد بيها، وهاد جواد المرحوم مغتصب المشردات كان مسؤول على خيرية لإيوائهم دايرها بحال شي مصيدة على مايبد، وهاد القضية كيتحاكم بيها من 2015 ومع ذلك بقا متقلد المسؤولية ويشارك في الانتخابات ويصوتوا عليه مواطني جنان الورد واخا مكيرحم حد فيهم واي واحد بغا يبني شي ياجورة خاصو يرشي، ولي عندو شب بنت مريضة عقليا او نفسيا هاصوا يحضيها من هاد الذيب البشري، والله حتى يستاهل وثائقي في نتفليكس هو والقضاة لي عطاوه برائة والقضاة لي دانوه في اللول وفي النقض.
جواد المرحوم لي مكيرحم لا مشردات لا مريضات عقليا لا سكان جنان الورد لي مافيه حتى وردة هو مثال لأعطاب الديمقراطية، وكيفاش أن الشعب فاش كيختار لراسو ممثلين عنه ماشي بالضرورة كيختار لي صالحين بل كيعزل أكثرهم فسادا وإجراما، وهذا من اعطاب الديمقراطية فاش كتطيح عليك من السما ماشي كتناضل على ودها ومتوصل ليها بالتدرج كمطلب شرعي، حاليا في فاس راه كل شهر تقريبا كيتعتاقل شي منتخب متزعم عصابة ديال الفساد وفي الغالب دخل للسياسة شبه معدم حتى كتلقاه من الملايرية ديال المدينة، وهاد القصة كتعاود في كل مدينة، راه خاص لي غادي يصوت يكون مؤهل بعدا وتتوفر فيه شروط العقل السليم والحكمة، أو غادي تبقى البلاد كتعاني من الفساد الى مالانهاية.