هادي جديدة فكازا. المهنة خطافة بالموطور. امين ل"كود": ها لكليان اللي كنهز وها كيفاش كنختارهم وعارف راسي ضد القانون

الخميس اللي فات كان عندي موعد فلاكورنيش فكازا. ما علي ما بي كنتسنى طاكسي صغير فشارع "لوباري"=باريس= حدا ساحة واد المخازن مع ديك لطناش ونص حتى وقف شاب من بعد غادي نعرف اسمو "امين". الولد على موطور "دوكير سي 50". سول "كتقلب على طاكسي"؟ طبعا باش تجيك مناسبة بحال هادي كتحرك فيك لفضول. رديت عليه "علاش"؟. جاوبني "نوصلك ايلى بغيتي". جبد الكاسك ومدو لي.
طبعا تحرك وداز على شارع بوركون وكمل الطريق على جامع السعود حتى لعين الدياب. هاد الشاب خطاف. خطاف بالموطور. وسيلة جديدة للخطافة اللي عندهم بلايص فضواحي كازا ممنوعة على الطاكسيات.
الشاب من درب السلطان على حساب روايتو ل"كود"٬ كيخدم فالعشية فشركة دسيكوريتي وفالصباح كيخطف بليصات. امين الثلاثيني ما كرهش يخدم غير فالموطور ويطلق الحراسة.
امين حكي ل"كود" باللي كيخدم من الثمنية حتى الوحدة وطبعا على حساب لكليان. حسب روايتو ديما ل"كود" قال باللي كيقدر يركب ما بين 4 و8 لكليان. "انا كنعرض على لكليان السرعة. كيقدرو ايلى ركبو معايا يوصلو بالزربة فمدينة فيها بزافت لومبوتياج" يضيف صاحبنا الخطاف بالموطور ل"كود".
طبعا على هاد الشي الثمن ماشي رخص من الطاكسي. اييه كاينة لمتاوية ولكن فرحلة من لوباري للاكورنيش طلعات ب30 درهم. مع الطاكسي تقدر تطلع قل شوية بشي 5 دراهم قل.
ولكن كيفاش كيختار صاحبنا لكليان؟ وفق روايتو ل"كود"٬ "حنا كازاوا كنعرفو من الوقفة اللي كيتسنى طاكسي. كاينة وقفة خاصة لهاد النوع. كندور فالشوارع وسط كازا. حقاش كنفضل نخدم غير فالسونتر٬ وباش بنتي لي كتقلب على طاكسي جيت عندك واقترحت راسي. ها كيفاش كنختار لكليان" يشرح صاحبنا ل"كود".
امين خطاف وعارف راسو كيخدم خارج القانون "طبعا انا خدام خارج القانون. عارف باللي ماشي قانوني نوصلك. كندير احتياطاتي. عندي الماسك وكنمشي باحترام القانون على هاد الشي ما عمر البوليس حتى عاق بي ولا شدني" يوضح ل"كود".
ويضيف ل"كود". "كندير حاجة اخرى باش ما يوقعوش لي المشاكل. ما كنهزش لبنات ولا الناس لكبار. غير الرجالة الشباب".
امين كيمنى يولي يهز كلشي وهاد الشي خاص ترخيص للماطر يخدمو طاكسي. طاكسي موطو. هنا قال ل"كود" "سمعت شي حد فالشمال عندو شي مشروع لهاد النوع. كنتمنى شي نهار توصل لكازا. مدينة محتاجة لهاد النوع من الطاكسيات. نولي خدام بالقانون".
فانتظار هاد الشي٬ كيتحرك امين كل صباح تقريبا فسونتر كازا كيقلب علي كليان.