تيران الدار البيضاء الجديد غيكون تحفة عالمية: المغرب غيبني أحسن ملعب فلاكوب ديموند 2030 وفالعالم وما فيهش غير الكورة

غيكون تيران الدار البيضاء الجديد اللي غيتبنى على قبل احتضان كأس العالم 2030، وتنظيم فينال المسابقة تحفة رياضية عالمية، وتوصل موقع "كود" بمعلومات على المرافق اللي غتكون فمشروع القرية الرياضية والملعب الكبير ديال الدار البيضاء اللي غيتبنى فمنطقة بنسليمان، وهذا الشي غيخليه هارب بزاف على ملاعب عالمية.
وغيتكون البروجي ديال التيران الجديد لمدينة الدار البيضاء، من ملعب رئيسي مغطي بطاقة استيعابية كتبلغ 115 ألف متفرج، ومع 4 ملاعب تداريب معتمدة من الفيفا وباركينك.
وكتبلغ ميزانية المشروع 5 ملايير درهم ( 500 مليون دولار)، ومساحة البروجي كاملة كتبلغ 100 هكتار، والموقع ديالو بالضبط كاين فجماعة المنصورية على بعد 38 كلم من الدار البيضاء، و18 كلم من المحمدية، بالقرب من مطار بنسليمان.
وتحددت 6 أشهر كحد أقصى للدراسات المعمارية والتقنية للمشروع، وبالإضافة إلى الملعب الرئيسي، فالمشروع غيتبنى فيه مدينة رياضية متكاملة بمرافق رياضية وترفيهية تيران لألعاب القوى كيتسع ل25 ألف متفرج، وقاعة متعددة الرياضات، وقاعة للجمباز، ومسبح أولمبي، ومركز للمؤتمرات والمعارض، ومركز للتسوق، وفضاء رياضي، وفندق، وحديقة.