الإسبانيين: المغاربة غيبنيو تيران كازا باش ياخدو لينا فينال مونديال 2030

تفاعل الإعلام الإسباني لكرة القدم مع قرار المغرب تشييد تيران الدار البيضاء الكبير اللي غيكون فمنطقة بنسليمان، وكيشوف ان هاد الملعب غيكون حاسم فتنظيم المغرب لفينال مونديال 2030.
وجريدة as الإسبانية وهي من أكبر وأشهر الجرائر الرياضية فإسبانيا تفاعلت مع توقيع اتفاقية شراكة بين الحكومة المغربية وصندوق الإيداع والتدبير المغربي بخصوص تمويل برنامج تأهيل 6 ملاعب وتشييد تيران كازا، وقالت "المغاربة غيديرو تيران كبير باش ياخدو فينال المونديال من البيرنابيو".
نفس الجريدة، قالت بلي ملعب الدار البيضاء الكبير اللي من المنتظر يكون فيه 113 ألف متفرج، باغيين المغاربة يتنافسو به مع إسبانيا على تنظيم فينال مونديال 2030، واكدت انه غيكون اكبر تيران فإفريقيا والثاني فالعالم، وبالتالي فالملعب د كازا مستوفي شروط الفيفا للفينال وهي يكون كيهز كثر من 80 ألف متفرج.