فضايح الحركة الشعبية مع أوزين: جاب ناطقة سابقا باسم البام باش تعين رئيسة للنساء الحركيات

منظمة التساء الحركيات غادية تعقد مؤتمرها هاد السبت ف بوزنيقة، والبارح تسرب للمؤتمرات خبر قرار تعيين الملتحقة الجديدة بحزب السبولة خديجة الكور، الناطقة سابقا باسم حزب البام فعهد حكيم بنشماس.
خديجة الكور كانت مقربة جدا من حكيم بنشماس للي عينها ناطقة رسمية ديال حزب التراكتور، ومللي طاح بنشماش ف المؤتمر للي تعقد ف الجديدة ف فبراير 2020 ،تم إبعادها من البام بقرار من الأمين العام المنتخب عبد اللطيف وهبي.
قرار استقدام خديجة الكور خداتو القيادية ف حزب العنصر حليمة العسالي وتبناه بطبيعة الحال الأمين العام محمد أوزين.
رئيسة النساء الحركيات حاليا الوزيرة السابقة نزهة بوشارب كتسنى منذ مدة هاد الضربة من عند حليمة العسالي، وباين بللي غادي يوقع ليها ما وقع لخديجة الكور ف البام: التوش.
هاد الحركة الشعبية مكاتنتهيش فيها لفضايح. فالدعوى ف المحكمة الإبتدائية بشأن نتائج المؤتمر ديال الحزب للي تعقد في نونبر 2022 مازالت سارية، وجلسة حاسمة غادية تعقد في الشهر المقبل وبالضبط يوم 07 دجنبر وممكن تكون فيها مفاجأة كبيرة تتعلق بالطعن للي تقدم به المرشح إدريس الزويني للي كيقول بللي تم إقصاءه من طرف المرشح الوحيد والأمين العام الحالي محمد أوزين.
المحامي ديال الحركة الاستقلالي سابقا حاتم بكار حط مذكرة جوابية ف المحكمة الإبتدائية يوم 02 نونبر الحالي كلها أخطاء لغوية وقانونية، وباين بللي الحركة الشعبية ف ورطة حقيقية منذ "انتخاب" محمد أوزين أمينا عام.
الخبطة ديال المؤتمر ديال الحزب غادية تزاد عليها خبطة أخرى فمؤتمر النساء الحركيات، فالوقت للي الحركة الشعبية ديال محند العنصر فأزمة مالية خانقة بعد قرار وزارة الداخلية تقطع عليهم الدعم السنوي للي كيتعطى للأحزاب السياسية بسبب خروقات في تدبير مالية الحزب.