فضيحة كبيرة فالحكومة. أمزازي دار صاحبو رئيسا لجامعة محمد الخامس وهو فشل فتسيير غير مدرسة بشهادة مجلس جطو

فضيحة خايبة بزاف للحكومة حسب متتبعين حيث سعيد أمزازي وزير التربية الوطنية والتعليم العالي والبحث العلمي دار واحد صاحبو فمنصب كبير عليه، اليوم الخميس صادق المجلس الحكومي على عدد من التعيينات فالمناصب العليا لكن المفاجئة هي التعيين ديال رئيس جامعة محمد الخامس الجديد.
المجلس الحكومي صادق كما جاء ف البلاغ ديالو على تعيين محمد غاشي في منصب رئيس جامعة محمد الخامس بالرباط – قطاع التعليم العالي والبحث العلمي.و سبق ل”كود” وقالت على أنه باين غادي يديروه فهاد المنصب حقاش دافع عليه بقوة بزاف الوزير أمزازي باش يكون هو الرئيس ديال أعرق جامعة مغربية.
الوزير أمزازي اللي كايقولو متتبعي الشأن د حزب الحركة الشعبية انه جا للوزارة حيث دافعات عليه حليمة العسالي المرأة القوية فحزب السبولة كاينسى ان منطق زرع الاصحاب ف المناصب قضية قديمة وماخداماش ف زمن ربط المسؤولية بالمحاسبة و فسح المجال للكفاءات الشابة.
و المصيبة لكبيرة حسب مصدر خاص أن هاد المسؤول عندو مشاكل كثيرة بزاف مع المسؤولين الإدريين ديال الجامعة والأساتذة ملي كان نائب رئيس الجامعة وماشي غير هادشي السيد كان فضحو المجلس الأعلى للحسابات سنة 2011 ملي كان يترأس المدرسة العليا للتكنلوجيا بسلا لمدة عشر سنوات. التقرير ديال قضاة جطو اهضر على اختلالات مالية خايبة..حسب المصدر دوما.