وا سيدنا راه لفرانسيس طغاو فمهرجان مراكش. شهادة صادمة. صحافي مشهور: هدرت فماستر كلاص مع واحد بغى يبرك حدايا جا فرنساوي قال لي بحقارة وحسيت بالحگرة: سكت ولا نخرجك" وعاملة: كيتخلصو حسن منا وكنخدمو كثر منهم

كاع اللي خدامين فمهرجان مراكش الدولي للفيلم متواطئين مع لفرانسيس. متواطئين مع اهانة للي جابوهم من فرانسا٬ للمغاربة. مهرجان دوز 20 عام وما قدرش يولي المتحكم فيه مغاربة. كانت محاولات قبل اكثر من 10 سنوات لمغربة هاد الشي. غير الصراعات الداخلية والتحالفات مع لفرانساويين ضد مرة نور الدين الصايل اللي كان نائب رئيس مؤسسة المهرجان ومع ضد جليل لعكيلي اللي كان الكاتب العام للمؤسسة فشل جميع محاولات المغربة. فيصل لعرايشي نائب رئيس المؤسسة كان متحالف مع ميليتا توسكان دو بلانتيي المديرة العامة للمهرجان انذاك.
اللي كيمشي للمهرجان وكيتابع دوراتو كيحس بهاد الحگرة فبلادو. كيفاش؟ كتشوف فرنسيين مكلفين بشي امور كيخليو اللي كيشبه ليهم يدخلو باحترام وكيبداو يزيرو مع اللي وجههم مغربي. اييه.
صحافي معروف ووجهو مألوف كان العام اللي فات معروض للمهرجان. كيعشق السينما ومحترم جدا. الصحافي كان حريص يتابع الافلام ديال المسابقة الرسمية والافلام الجديدة وحتى الماستر كلاص. مرة دخل وكيف عادتو رجع اللاور. كانت بلاصة حداه خاوية فهاد الماستر كلاص. شي حد برك ومن بعد خرج. جا شي حد سولو واش خاوية. رد عليه وهو يجي واحد من المنظمين وفرنسي الشكل والجنسية وهددو: سكت ولا نجري عليك. اييه بهاد اللغة بدون ادنى احترام هددو هاد الفرنسي باش يطردو.
الصحافي ما عندوش مع الصداعات. مشى خبر شي مسؤول مغربي على ما حدث. جا كيجري ووبخ الفرنسي.
اش من توبيخ ولا التخربيق. الصحافي هاد العام واخا معروض قاطع الدورة. رفض يبقى يحس بالحگرة. بهيمنة عقلية استعمارية لبعض الفرنسيين.
واحد من اللي كيخدم سنوات فهاد المهرجان قال ل"كود" "راه حنا كنقولو باراكا من لفرانسيس. راه 20 عام التجربة قادين نظمو مهرجان بمواصفات دولية". المصدر اضاف ل"كود" "راهم كيتخلصو حسن منا وكنخدمو كثر منهم وما كيطلقوش الخدمة".
دابا مع الادارة الحالية فشلات باش تمغربو خاص تغيير القانون الداخلي لمؤسسة مهرجان مراكش وخاص تغيير الرئاسة. ياخدها شي حد اخر من غير الامير مولاي رشيد.
هادوك اللي معاه سواء البقالي او لجواهري دعمو فاكثر من مناسبة الفرنسيين ضد لمغاربة. الراحل نور الدين الصايل باش كان نائب رئيس للمؤسسة عانى كثير من هاد الشي. خاص فريق جديد عاشق للسينما ومدافع شرس على مغربة شاملة للمهرجان. حتى ايلى جا شي مدير فني او شي مسؤول فدومين محتاجينو خاصو يكون خدام عند لمغاربة ماشي خادمين عندو