اليوم عيد عند عشاق السينما فالمغرب. اليوم انطلاق دورة جديدة بعد تعليق دورة 2017 لاسباب ما معروفاش او ما بغاوش يقولوها المنظمين. سوقو لفكرة غبية كتقول باللي توقف لسنة باش يتجدد التفكير فخط المهرجان التحريري. ما يمكنش لمهرجان يوقف عام باش يجددو خطو التحريري. هاد الخط كيكون محدد بوضوح النهار الاول ولا كان شي تعديل كيكون بلا ما يوقف بلا ما ينقزو العام. المشكلة فهاد التوقيف هو انو دار من الفوق وحقاش على رأس مؤسسة مهرجان مراكش المنظمة للمهرجان الدولي للفيلم الامير رشيد اخ الملك محمد السادس ما يمكنش نحاسبو حتى حد ولا حتى يشرحو لينا بوضوح اش وقع. كيفاش تجدد التفكير فالخط التحريري واللي تبدل من الفرقة القديمة هو برونو بارد مول “بوبليك سيستام” والمدير الفني للمهرجان. المدير الفني فكاع التظاهرات فالعالم خدمتو تطبيق الخط التحريري اللي كديرو الرئاسة ماشي يدير ما بغى. باستناء بارد كلشي مازال. فيصل لعرايشي وصارم الفاسي الفهري اللي عندهم صفة نائبا الرئيس بالصفة حقاش الرئيس المدير العام للشركة الوطنية للاذاعة والتلفزيون والمركز السينمائي المغربي٬ مازال كاينين واخا ما عمر شي حد عرف لاش كيصلحو من غير يتحالفو مع مليتا توسكان دوبلانتيي المديرة السابقة المستشارة الحالية على مغاربة بحالهم. هاد الشي كيفرض تغيير النظام الاساسي وما يبقاش اوتوماتيكيا مدير المركز السينمائي ورئيس الشركة الوطنية للاذاعة والتلفزيون اعضاء فالتنظيم. كاين نقطة اخرى هو الرئاسة. دابا عند الامير رشيد هادي دورات. ما طورش المهرجان بالشكل اللي خاصو يتطور بل ما تمغربش كاع. بقينا رهينة للاجانب. واخا المهرجان عندو 18 عام كيبان كبير باش تحضر ليه. دخل معاه الزمان. حقاش الدورات كتشابه. دابا كاين شي دماء جديدة من المغرب من لبنان من اوربا. واش هاد الشي كافي؟ ماشي فهاد الدورة نقدرو نعرفو الجواب. الدورة الحالية اللي غادية تبدا اليوم غادية تكون احسن من السابقة لسبب بسيط حقاش توجدات فظروف ماشي طبيعية. عامين باش يديرو دورة. مع فضيحة التوقف وجدو مزيان باش تكون الدورة اللي غادية تختاتم ف8 دجنبر مزيانة. لكن الحكم فالدورات المقبلة باش يولي يدار كل عام. اييه كاين الجديد فهاد الدورة بحال قسم “القارة 11” اللي قال عليه المهرجان باللي للفضوليين العاشقين للسينما اللي بغاو يكتاشفو 14 شريطا روائيا ووثائقيا تتميز كلها بكتابتها الفريدة والمبتكرة لمخرجين جريئين ينحدرون من التايلاند، ولبنان، وكرواتيا، وجنوب إفريقيا، والنمسا، والفيليبين، والولايات المتحدة كاين “الهدرة مع” وهو قسم جديد باش تكون لقاءات مع أسماء كبيرة في السينما العالمية. دابا 7 نجوم قبلو الدعوة وهم المخرج الأمريكي مارتن سكورسيزي ، والممثل روبرت دي نيرو ، والمخرج والروائي والمنتج المكسيكي غييرمو ديل تورو ، والسينمائية الفرنسية أنييس فاردا ، والسينمائي المصري يسري نصر الله ، والمخرج وكاتب السيناريو والمنتج الروماني، كريستيان مونجيو ، وكذلك المندوب العام لمهرجان كان السينمائي ومدير معهد لوميير في ليون، تييري فريمو. هاديك بانوراما السينما المغربية كانت ماشي جديدة. فالمقابل سينما التحريك جديدة وغادية تكون فسينما كوليزي. ورشات الاطلس خداوها من كان وقطر ودبي ومهرجانات اخرى ماشي جديدة فالسينما. هادي موجهة لمواهب من افريقيا والشرق الاوسط غادي يتم دعم مخرجين شباب كاينة امور اخرى ولكن هاد العرس اللي خاصو يبقى وخاصو يتطور ما خاصوش يبقى بيد وحدين ما عندهم حتى شي صفة وكيتحكمو فامور كثيرة بحال البقالي ومهدي جواهري من فريق الامير رشيد. كاينة امور اخرى مرتبطة بالمارشيات بالتنظيم غادي يجي وقتها هاد العرس مهم بزاف للمغرب. مهم بزاف للسينما. ما خاصوش يتحول لعطلة لبعض المتطفلين. خاصو يبقى عرس اللي كيعشق السينما ولا شيء غير السينما. عندنا كان كعبرة علاش ما تعلموش منو فكلشي واخا الفرق العظيم بينا وبينهم.
