"وهم" تجميد النظام الأساسي والزيادة فصالير الأساتذة.. كيفاش الحكومة مقدراتش تواجه أزمة كبيرة فالتعليم وبقات مستمرة فحوار مع نقابات بلا أفق والإضرابات فخدمة لوبي التعليم الخاص

تجميد النظام الأساسي لموظفي التربية الوطنية والزيادة فصالير تبين بلي غير "وهم" كتواجه به الحكومة الاحتجاجات، هادشي معروف عند أي متتبع لموضوع إضرابات الأساتذة، أولا التجميد ماشي قانوني وثانيا الزيادة فالأجور مكاينش فقانون مالية 2024.
مشروع ميزانية 2024 مافيهاش زيادة فالأجور، كاين كلام فقط حول تعديلات كتخص تخفيض الضريبة على الدخل بالنسبة للطبقة المتوسطة، هاد تخفيض الضريبة على الدخل كتعني تحسين الدخل.
مصطفى بايتاس الناطق الرسمي باسم الحكومة، قال اليوم فالندوة الصحافية الأسبوعية للمجلس الحكومي بلي "الضريبة على الدخل غايكون عليها نقاش السنة المقبلة". إوا شوفو على جواب، واش قصد قانون مالية 2025 ولا شي قانون مالية تعديلي غايجيبوه.
وبخصوص الحوار مع النقابات، قال بايتاس: "الحكومة باشرت لقاءاتها مع النقابات التي تشتغل في مجال التعليم. هناك اجتماع أمس واليوم، والهدف (بالإضافة إلى تجميد النظام الأساسي هو التقدم في مختلف النقط التي تثير تخوفات)"، مضيفا: "النقاش يسير بشكل جدي ومسؤول".
الحكومة متقدرش تقول بلي كاينا زيادة فالأجور. حيثاش مكايناش أصلا. وهادشي سبق أكدو مصدر رسمي ل"كود"، واللي أشار بلي وزارة المالية رفضت دير زيادات متقدرش عليها الخزينة ديال الدولة.
رغم الهامش المالي الضعيف، حاول شكيب بنموسى الوزير المعني بالقطاع يدير إصلاحات، وفعلا نجح فنموذج مدرسة الريادة اللي خصو يتعمم، هاد النموذج لي مبغاتوش المدارس الخصوصية لأن "مدرسة الريادة" كتعتمد نفس تقنيات التدريس فالبريفي (تعلم اللغات والرياضيات عن طريق المسرح والفن والرياضة..).
نتائج أولية لمدرسة الريادة لي تطبق على مستوى 628 مدرسة ابتدائية عمومية ويستفيد منها 322 ألفا تلميذ و10700 أستاذ و157 مفتش تربوي منخرط ومتطوع، تؤكد بلي ناجح ولقاو تحسن كبير فمستويات التلاميذ على مستوى مواد الرياضيات واللغتين العربية والفرنسية.