عرس اسطوري فيه ريحة السياسة...البرلمانية البامية بنطالب عرسات فمراكش وعائلتها معرضوش على المنصوري ووهبي وكودار وفضلو المطرودين من الحزب يحضرو

زاهيا هاد الايام زواج بين الاثرياء والملايرية فالبلاد، والوجهة ديما هي مراكش، واخرها حسب ما علمته "كود" هو زواج ابنة ملايري نافذ فمدينة البهجة وكيتعلق الأمر ببنت البرلماني الحبيب بن الطالب اللي تشهر بتصريح منسوب ليه فيه بلي قادر بشبكاته ونفوذه يرشح المشة ديالو للبرلمان ماشي غير عائلتو. طبعا هو نفى.
مهم العرس للي دار بن الطالب لبنتو البرلمانية في فريق الاصالة والمعاصرة بمجلس النواب، فاطمة الزهراء بن الطالب، حضرات فيه السياسة بقوة.
فهاد العرس اختار بن الطالب يعرض على كولشي الا على قيادة البام سواء الوطنية أو الجهوية أو المحلية، ماعيطش لا على فاطمة الزهراء المنصوري عمدة المدينة ولا لرئيس الجهة سمير كودار، ولا لعبد اللطيف وهبي الامين العام للحزب.
بنطالب هو من العائلات لي كتنافس تيار المنصوري فمراكش، بحيث أن الحبيب بنطالب مستشار برلماني ورئيس الغرفة الفلاحية بالجهة، وورئيس جامعة الغرف، ومرتو رئيسة مجلس عمالة مراكش، وعندو ولد برلماني ولد اخر عضو مجلس عمالة مراكش.
بل أكثر من ذلك اختار بنطالب يعيط على المطرودين من البام خصوصا للي من الصحراء. باين هاد العرس غير طريق باش يديهم لشي حزب منافس للبام.
بنطالب كان مديرا لتعاونية الحليب بمراكش والتي تم افلاسها في عهده بعدما كانت اكبر تعاونية في المغرب ودبا ولا من أكبر الفلاحين والأغنياء بعدها كان موظفا بسيطا.