المنصوري لي مقدراتش تحرك نملة فوزارتها وتحارب الحيثان ديال العقار فتحات تحقيق على فضايح التعمير بتمارة.. ومصدر ل"كود": تحقيق ما عندو حتى معنى حيت الداخلية لي شادا التعمير وراها فتحات تحقيق

علمت "كود" أن فاطمة الزهراء المنصوري، وزيرة إعداد التراب الوطني والتعمير والإسكان وسياسة المدينة، فتحت تحقيق إداري ففضايح التعمير بمدينة تمارة لي كولشي كيهضر عليها.
هاد التحقيق، حسب مصدر مختص فالتعمير، ما عندو تا معنى، فالوقت لي الداخلية فتحات تحقيق، متسائلا :"واش حتا فالتحقيقات كاين هاد التداخل وكثرة الاجراءات ووو..اضافة إلى وجود تحقيق أمني غادي يوضح كولشي".
كولشي عارف بلي هاد القطاع ديال التعمير بيد الداخلية. ماشي بيد الوزيرة لي كتوصف بالمرأة الحديدية فالبام.
الوزيرة لي جات فالأول ديال الولاية الحكومة كتقول للاعلام بلي غادي تحارب الفساد وتقاد القطاع، ودبا دازت عام متبدل والو وقوانين مبلوكيا بحال قانون البناء وزيد وزيد. الوزيرة مقابلة الحوارات والمنتديات الجهوية والمؤتمرات.
الوقت بغات وزيرة أو وزير يكون مكفضين على ذراعم باش يقادو هاد القطاع ديال التعمير، لي هو أساس الاسثتمار وأساس الاستقرار الاجتماعي فبلادنا.
بلا عدالة عقارية مكاين والو. كولشي كيتشكا من المساطر والتخلويض فهاد الضومين، هادشي بان كثر فمناقشة مشروع قانون 2023، برلمانيين عندهم استثمارات ضخمة وبعلاقاتهم ونفوذهم كيغوتو وسط اللجنة على هاد الملف. لدرجة أن عزيز اللبار الملايري والبرلماني عن البام ناض كيغوت وقال :"وا قتلتو فاس " وكيهضر على مشاكل فالاستثمار منها العقار.
يشار بلي فيوم الاثنين 24 اكتوبر من الشهر للي يالله سالى وقع زلزال فالداخلية. بيان لهاد الوزارة القوية فيه توقيف يوسف الضريس عامل عمالة الصخيرات تمارة و6 من رجال السلطة وجوجت الاطر الادارية فديك العمالة. البيان قال باللي البحث الاولي للمفتشية العامة للإدارة الترابية شاف ووقف على بزافت الخروقات فالتعمير بخروقات في مجال التعمير.