الطاسة تزاد او تتقص في الثمن هادشي ثانوي مادام المواطن غير محمي من الغشاشة والكرابة والمهربين وحتى فاش كيشري من الأماكن المرخصة راه بحال الى غير كيديرو فيه خير وصافي لانهم ماشي من المفروض يبيعو ليه قانونيا

خبر ديال الحكومة غادي تنقص من ثمن الشراب العام الجاي، هو هبر مفرح للبعض لأن الشراب غالي بزاف في المغرب وفي نفس الوقت البدائل الأخرى للاحتفال والمرح قليلة إلى نادرة، غاهو في نفس الوقت راه القانون باقي كيجرم المغاربة لي كيستهلكوا الشراب وأماكن البيع غير موجهة ليهم في الأساس، المغاربة لحدود الان باقي كيشربو كوطربوند وخاصهم يتخباو، وحتى البيران في المغرب دايرين بحال شي أماكن سرية لتعاطي مشروب غير قانوني ديما مظلمة ومعزولة ومكيبان والو من برا، بينما الاحنبي يمكن ليه يشرب بيرة في لاطيراس في أي بلاصة في المغرب على خلاف المغربي ولد البلاد.
المغربي باقي مايمكنش ليه يشري شراب من كارفور مثلا وياخد التيكي ديالو معاه بحال أي منتوج، بينما الأجنبي كياخد التيكي ديالو حداه وهو كيشوف، من هاد الناحية باقي المواطن كيتعامل قانونيا كأنه أدنى درجة من الأجنبي، راه المغربي في بلادو كيعاني من قوانين شبه قانون جيم كرو ديال الفصل العنصري في ميريكان او الابارتايد ديال جنوب افريقيا، راه معندها معنى ولحدود الان تبقى هاد القوانين المتخلفة لي مكانتش حتى في عهد خلفاء الإسلام أيام الامبراطورية العباسية، راه بغداد كانت القوانين فيها كتحمي السكايرية كثر من مراكش دابا .
هادشي راه بحال حملة توزيع العازل الطبي في مولاي براهيم في الالفينات، زعمة لمحاربة السيدا في بلاد فيها ممارسة الجنس خارج اطار الزواج جريمة، اول ماخاص يتبدل هو هاد القوانين البالية، جوج راشدين ماخاصش تتدخل الدولة في شنو كيديرو بأعضائهم التناسلية مادام التراضي كاين، كذلك الطاسة تزاد او تتقص في الثمن هادشي ثانوي مادام المواطن غير محمي من الغشاشة والكرابة والمهربين وحتى فاش كيشري من الأماكن المرخصة راه بحال الى غير كيديرو فيه خير وصافي لانهم ماشي من المفروض يبيعو ليه قانونيا وفاش كيبيعو ليه حتى التيكيت مكياخدوش معندو حتى دليل انه شرى من عندهم، وهادي بلاد باغا تعيش بالوسطية والاعتدال وتعتبر راسها سياحية.