الوداد خسرو مع سيمبا والتأهل لربع نهائي شومبيونزليك تعقد: الواك ضيعو الأهداف وسيمبا عاقبوهم والحكم كان خايب

تعقدات الأمور عند الوداد الرياضي فدوري أبطال إفريقيا، بخسارة جديدة فدور المجموعات اليوم الثلاثاء فدار السلام، ضد سيمبا التنزاني ضمن الجولة الرابعة.
وخسرو الوداد الرياضي مع سيمبا التنزاني بنتيجة 2 لزيرو، وبقاو لاعبين الوداد كيضيعو فالأهداف والفرص بشكل غريب بسبب التسرع وقلة التركيز، وعكس مجريات الماتش قدرو سيمبا يضربو الهدفين ديالهم بواسطة الكاميروني ايسومبا أونانا فالدقيقة 36 والدقيقة 38، وفالشوط الثاني دار فوزي البنزرتي تغييرات فمحاولة للرجوع فنتيجة الماتش ومن بينها زهير المترجي اللي دخلو، ولكن بقاو الواك كيضيعو الأهداف بشكل غريب ومن بينها فرص جات للمهاجم صامبو اللي ضيع شي كواري برعونة، وبالمقابل بقاو سيمبا كيديرو ليكونطر أطاك اللي كانت مرة مرة كتبرزط، مع العلم الحكم ما عطاش 2 ضربات جزاء واضحة على الأقل، وكانت قرارات تحكيمية غريبة منو.
الخسران ديال الوداد الرياضي اليوم كتعقد الأمور بالنسبة للفريق الأحمر فالتأهل إلى ربع نهائي دوري أبطال إفريقيا، والفريق رجع للمركز الأخير فالكروب الثاني برصيد 3 بوان، جمعها من رباح واحد و 3 خسارات، وسيمبا طلعو مؤقتا إلى المركز الثاني برصيد 5 نقاط، في انتظار نتيجة أسيك ميموزا الإيفواري المتصدر ب7 نقاط، وكلاكسي البوتسواني الثالث دابا برصيد 4 نقاط، والأمور مازال ملعوبة بالنسبة للوداد ولو أنها معقدة، والفريق غيخرج الماتش الجاي عند كلاكسي البوتسواني وغيدخل بعدها أسيك ميموزا الإيفواري وخاصو يربحهم بجوج ويتسنا كادو.