فضيحة هادي: صونارجيس مازال ما بداو الإصلاحات فدونور والگليبي كيطالب الوالي والعمدة بالتدخل والرجاء والوداد معذبين

مازال ما بدات الأشغال فملعب مركب محمد الخامس بالدار البيضاء واخا التياران مسدود شهر وصرف دابا، حيث تعطى لشركة "صونارجيس" باش تتكلف بالإصلاح ديالو استعدادا لكاس أفريقيا 2025 اللي غينظمها المغرب، ولكن مازال ما كاين حس الإصلاح فالتيران اللي السدان ديالو مكرفص الرجاء والوداد الرياضيين ومخليهم يقلبو على تيرانات خارج كازا فين يدخلو ماتشاتهم، ومؤثر حتى المداخيل المالية اللي وصلت لكثر من 3 المليار بالنسبة للفريقين بسبب إغلاق ستاد دونور.
وكشف كريم الگلايبي عضو لجنة القيادة والتتبع لمركب محمد الخامس لموقع "گود"، بلي مازال الأشغال بمركب محمد الخامس ما بدات لحدود هذه اللحظة، وان هذا الشي كثير الاستغراب خصوصا وان مجلس مدينة الدار البيضاء عقد دورة استثنائية شهر يوليوز الماضي، باش يصادق فيها على اتفاقية تأهيل وتدبير وصيانة المركب الرياضي محمد الخامس والمرافق ديالو.
ووجه المسؤول البيضاوي ميساج للوالي والعمدة ديال الدار البيضاء وطالبهم بالتدخل العاجل باش يعرفو شنو الأسباب الحقيقية اللي معطلة انطلاق الاشغال فستاد دونور، وأسباب هذا التأخر وكذلك طالب بعقد لجنة القيادة والتتبع فأقرب وقت للاطلاع على برنامج تأهيل التيران باش يكون واجد حسب المعايير الدولية المتعارف عليها، استعدادا لاستضافة المغرب نهائيات كاس أفريقيا 2025.
وكيحط هذا التأخر لانطلاق اشغال ملعب المركب الرياضي محمد الخامس بالدار البيضاء شركة "صونارجيس" فوقف محرج بزاف قدام الرأي العام الوطني، خصوصا وان الرجاء والوداد صابرين واخا متضررين من هذا السدان، مع العلم ان مدة الإغلاق ديال دونور للاصلاح هي 15 شهر، وخاص التيران يكون واجد شهر 12 ديال 2024 كيفما تم الاتفاق عليه.