بعدما دخلت أزمة التعليم للحيط .. العدل والإحسان بغات تشعلها فالصحة ومصدر ل"كود": بداو تحركات ولكن ميقدروش يخلقو تنسيقيات بسباب استباقية مسؤولي القطاع والالتزام باتفاق جديد لتحسين وضعية الموظفين

مور فاش وصلت أزمة التعليم للحيط بسبب استمرار الاحتجاجات لي خلات التلاميذ بلا قراية ومهددين بسنة بيضاء، واللي العدل والإحسان دارت جهدها وأطرها باش تزيد تشعل فهاد القطاع، ناضت تحركات فقطاع الصحة من طرف محسوبين وأعضاء فالجماعة نفسها.
الجماعة كتراهن كيف ديما على تراكم الاحتجاجات الفئوية فسياق اقتصادي صعيب كيدوز منو المغرب، بسبب ظروف الجفاف واستمرار ظاهرة التضخم وتدني القدرة الشرائية للطبقة المتوسطة.
وحسب مصادر "كود" فإن الجماعة اللي كتشتغل خارج المؤسسات، كتحاول اليوم تستغل تواجد عدد من أطرها وأعضائها في تمثيليات النقابات ومحركين القواعد الصحية سواء من خلال تنظيمات جديدة ديال الممرضين أو من خلال حضورهم القوي في مكاتب طلبة الطب والصيدلة اللي ناضو كيحتجو.
الجماعة بغات تشعلها فالصحة بعدما وصلت أزمة احتجاجات التعليم للباب المسدود، هادي طريقة الجماعة فالاحتجاجات، حسب باحث متبع مسار هاد التنظيم، بحيث أكد بلي كيفما دارت ف20 فبراير وصلتها للباب المسدود لأنه "لا يعقل يستجب ملك البلاد بإعلان عن دستور جديد يتجاوز في الكثير من بنوده مطالب 20 فبراير ورغم ذلك الجماعة استمرت في الاحتجاجات رفقة بقايا اليسار الراديكالي حتى وصلو لباب مسدود وانسحبت الجماعة".
وأضاف المتتبع لشأن الجماعة ل"كود": "راه نفس الشيء غادير فالتعليم، غاتشوف دبا طرد بعض الأساتذة وغادي تنسحب، مور ما وصلت هاد الأزمة للباب المسدود، واللي بغا يعرف تحريض لي دايرا الجماعة باش يستمر الاحتجاجات يشوفو مواقع التواصل الاجتماعي وموقع الجماعة فالإنترنت".
لكن مصدر بوزارة الصحة أكد ل"كود" بلي الوزارة وجدات خريطة طريق واضحة لتحسين وضعية الموظفين عبر الوظيفة الصحية، وغادي تحسن الصالير لجميع الفئات وتفك الملفات العالقة، هادشي ماشي نوايا هادي التزامات الوزارة، مضيفا: "كولشي عارف داخل القطاع بما فيهم عناصر الجماعة بلي آيت الطالب ملي كيعطي وعد أو يدير اتفاق كيقد به وكيديرو داكشي علاش مشفناش تنسيقيات".