الركراكي: احتفال أوناحي ضد تنزانيا ما عندو علاقة بمصر.. كنحتارمو المصريين وهما نموذج لنا فالكورة وعز الدين عارف هادشي

أكد الناخب الوطني وليد الركراكي أن داكشي اللي راج على عز الدين أوناحي بعدما احتفل بالهدف اللي ضرب البارح تنزانيا فالجولة الأولى من دور مجموعات كأس أفريقيا ما شي صحيح، وأنه ما عندو علاقة بمصر أو المنتخب المصري، وشدد بلي المغاربة ومنهم أوناحي كيحتارمو المصريين.
وتحدث الناخب الوطني وليد الركراكي، وقال: "غير الناس باغيين يكبرو الهضرة على عز الدين أوناحي، قالو لي أن الجيست ديالو فماتش البارح ما عندو حتى علاقة مع مصر، وعلى هذا الشي كنضحك، وحتى أنا واحد المرة هضرت فندوة صحافية على شي حاجة باغيين يخرجوها على بلاد آخر، خاصنا نوقفو البوليميك، بالعكس مصر كيفما قال عز الدين نموذج لنا وعندهم لاعبين كبار، وأوناحي حتى هو عارفها".
وكمل الركراكي: "داكشي اللي دار ماشي عليهم هما وعز الدين أوناحي ما عندو علاقة بهاد البوليميك، وكان دار حوار قبل كوب دافريك على مصر وكيفاش كيلعبو والأسلوب ديالهم، وكنحتارمو المصريين والشعب المصري، ونتمناو يربحو اليوم غانا، والجيست اللي دار أوناحي البارح ما عندو حتى علاقة وحنا خوت وكاينين شي ناس باغيين يديرو الصداع على والو".