الركراكي: كوب دافريك واعرة ما سهلاش وكل الفرق باغيين يربحوها وها الفرق فين كاين

أكد الناخب الوطني وليد الركراكي أن كوب دافريك ماشي ساهل، وأن المنتخب الوطني المغربي غيوجد له دابا حيث عرف المنافسين ديالو فالمسابقة الأفريقية اللي كلشي الفرق اللي لاعبينها باغيين يربحوها، ولكن الفرق غيديروه التفاصيل والتجرية.
وعلق الناخب الوطني وليد الركراكي على الكروب اللي طيحت فيه قرعة كأس إفريقيا المنتخب الوطني المغربي، وقال للموقع الرسمي ديال الجامعة الملكية المغربية لكرة القدم: "كنا عارفين هاد كأس إفريقيا من أقوى كؤوس إفريقيا اللي غيدارو، ماكاينش شي فراقي اللي ساهلين ما كاينش شي كروب اللي ساهل".
وكمل الناخب الوطني وليد الركراكي: "طحنا مع جوج فراقي اللي غيكونو معنا فإقصائيات كأس العالم، حنا كنوجدو ريوسنا باش ندخلو للكومبيتيسيون من دابا، ودابا عارفين مع من غنلعبو.. ملي كتشارك فالكومبيتيسيون خاصك تكون واجد مع أي فريق وكنحتارمو أي فريق.. الكروب ديالنا متوازن وما ساهلش وغنديرو اللي علينا باش نمشيو لأبعد نقطة".
وزاد وضح الركراكي: "شفتو الفرق والكروبات اللي كاينين أي واحد فيهم كيحلم يدي الكاس، وحنا منهم ولكن غنمشيو بالاحترام مع هاد لاكومبيتيسيون.. عارفين لافريك عندنا كروب زوين وفيه الدراري اللي باغيين يديو شي حاجة مع المغرب، ولكن ما غتكونش ساهلة وخاصنا نوجدو لها مزيان".
وشدد وليد الركراكي وختم: "المهم هي ليكسبيريونس سوا ديالي أو ديال الطاقم اللي معيا، ولعبنا فلافريك وفهاد ليكومبيتيسيون، وعارفينها كتلعب فالتفاصيل وغنوجدو والمهم هو الانضباط".
وطاح المنتخب الوطني المغربي فالكروب 6 من كأس أفريقيا الكوت ديفوار 2023، مع كل من منتخبات الكونكو الديمقراطية، وزامبيا، تنزانيا.