أوناحي: ما كنقولش غنربحو كوب دافريك وكلشي دابا باغي يربح المنتخب المغربي

قرر الدولي المغربي عز الدين أوناحي الحفاظ على التواضع وإبعاد الضغط عليه وعلى المنتخب الوطني المغربي قبل كأس إفريقيا المقبلة بالكوت ديفوار، وأكد بلي ما يقدرش يتكهن أن الأسود غيربحو البطولة ولكن أكد أنهم غيمشيو مستعدين لها مزيان.
وتحدث عز الدين أوناحي فحوار مع RMC وقال: "ما كنقولش بلي غنربحو كوب دافريك، ولكن غنكونو واجدين لها 100% وهاد هو أهم حاجة، وفالمسابقة كاينين منتخبات قوية ولاعبين كيلعبو فجميع أنحاء العالم، وكيف كنشوفو الكورة الإفريقية كتطور وراه شفنا الدومي فينال اللي دار المنتخب المغربي فمونديال قطر وهو أحسن مستوى للأفارقة وإنجاز فالتاريخ، وفكوب دافريك ما كاين حتى شي ماتش ساهل سوا فالنهائيات او الإقصائيات، راه لعب مباراة فلافريك ماشي شي حاجة ساهلة، وماشي نفس المناخ ديال أوروبا وماشي نفس التضاريس وكاينين بزاف الحاجات مختلفة".
وكمل عز الدين أوناحي وقال: "دابا حنا هو المنتخب اللي باغي كلشي يربحو سوا فماتش أميكال او رسمي، كلشي باغي يربحنا وهذا الشي اللي غيخلينا نوجدو ريوسنا 100% ونركزو فكل ماتش، راه لعبنا مؤخرا فالكوت ديفوار، وشفنا كيفاش كانو الإيفواريين موجدين لينا 200%، وكوب دافريك غيكون صعيب وما غنحگرو حتى خصم وغنبقاو مركزين".
عز الدين أوناحي فتح قلبو ودوا أيضا، على الفترة الصعبة اللي داز منها مع بداية هذا الموسم فأولمبيك مارسليا وكشف أنه إلى جانب الإصابة اللي كانت عندو، كان كيعاني نفسيا أيضا بسبب شي أمور شخصية ما بغاش يدوي عليها، وأكد أنه بدا كيرجع تدريجيا لحياتو الطبيعية وللنيفو ديالو.