الپاركينگات مصاوبين مقادين في المدينة العتيقة لفاس خاصهم غير يتحلوا ولكن الجماعة مصرة انها تخلي المواطنين عرضة لإبتزاز الزطاطة والشفارة وأصحاب السوابق يوميا

كاينة العطلة اغلب المدن السياحية في المغرب عامرة وفيها الرواج إلا فاس، هاد اليوماين هبطت للمدينة القديمة لفاس أجمل المدن العتيقة في المغرب وأكثرها غنى وثراء بالتاريخ والمواقع ومع ذلك خاوية والرواج فيها قليل، اول موشكيل غادي تلقى هو فين تحط الطوموبيل موشكيل من سنوات هادي كان خاصو يتحل وراه تصاوبو مواقف السيارات ومع ذلك باقين مسدودين وباقي جماعة فاس كتخلي المواطنين عرضة لإبتزاز الشمكارة وذوي السوابق، كان خاص ندور نص ساعة باش نلقى فين نحط الطوموبيل أولا بديت من حدا القصر وقلبت في البطحة وفي باب بوجلود عاد درت لعين ازليطن لقيت فين نوقف وفاش كنت غادي جا وقف عليا واحد الزطاط بغا نخلصو على آش الله واعلم، وبحال هذا راه الجماعة لي سامحة بيهم اما الباركينك مقاد مصاوب نجي نحط طوموبيلتي في الأمان نخرج نخلص والفلوس تمشي للجماعة باش يقاد بيها البصيري قهوة لوبوغجوا، ولكن للأسف كأي حاجة في هاد المدينة كتمشي ببطئ قاتل وكتخس بلي حتى شي مسؤول معندو غيرة على فاس.
انا ساكن هنا هانية غادي نعرف منين ندخل ونخرج ولكن مالذي تعده فاس السائح المحلي والاجنبي من غير صعوبة الولوج أولا، مكاينش وسائل النقل العمومي للمدينة وهادي مفارقة عجيبة عندك اقدم واعرق مدينة قديمة ومع ذلك كاع ممسوق لكيفاش الناس يوصلو ليها، وحتى فاش يوصلو كتخليهم عرضة لإبتزاز قطاع الطرق والشفارة والزطاطة. بينما مواقف السيارات نصفها راه مقاد ومجهز وخاصو غير يتحل، خاصو غير الإرادة للأسف لي ممايناش في هاد المدينة لي كل سيمانة كيتشد واحد من مسؤوليها بتهمة الفساد.
الپاركينگات مصاوبين مقادين في المدينة العتيقة لفاس خاصهم عير يتحلوا ولكن الجماعة مصرة انها تخلي المواطنين عرضة لإبتزاز الزطاطة والشفارة وأصحاب السوابق يوميا، وتخلي تجار المدينة وكاع المشتغلين بالقطاع السياحي كيموتوا عرق بعرق حيت مكاينش الولوجيات للمدينة، بالاظافة الى الزبل والوسخ والشمكارة والمشرملين ربايع وسط الازقة المفروض انها سياحية زعمة، الى كانت كتعاقب هاد المدينة فراه تعاقبات بما فيه الكفاية دابا خاصها الرحمة شوية ديال الرحمة او رصاصة الرحمة وتنسى نهائيا كأنها لم تكن.