سقراط يحكي ليلته في أكادير:المغربي هنا مواطن من الدرجة 3 بعد الخليجي والكاوري:

محمد شكري خلد ليل طنجة من خلال كتاباته كما لم يخلد ليل أي مدينة أخرى، جمله وأعطاه روح، لدرجة جعل مجرد التواجد فأماكن كتب عليها فعل حميمي عندو قيمة عاطفية، واخا راه العديد ديال من البلايص لي كتب عليها إما مابقاتش كيما هي أو هو كتب عليها أفضل مما هي فالواقع، الكتابة فحد ذاتها فعل لتجميل الواقع لتلطيفه لصبغه بعواطفنا اتجاهه.
لكل مدينة ليلها الخاص لكل منها طباعها، الرعاوين لهم بقعة جغرافية محددة وبالظبط في المنطقة التي حكمها البرغواطيون فيما مضى، بين قنيطرة و آسفي، بالإضافة إلى سهل تادلة من ولاد عياد حتى لبن حمد، في مراكش الترعوين له أصول ومتجدر في القدم، ترعوين متحضر لكن خطر، لكن أكادير وعلى خلاف ما كنت أظنه فهي مدينة محافظة على الرغم من أنها وجهة سياحية ( راك فاهم)، أناسها تحكمهم التقاليد والعادات ويحترمونها، ليلها خالي من العربدة وبوليسها متواجد في كل مكان، لا خطر في ليل أكادير إلا من السطافيط، لا مغامرات غير محسوبة ولا صداقات جديدة، كلها حاتي على بيرتو وكيدوي غي مع لي كيعرف، إلا ماخلقتيش الأكشن لراسك مكاينش لي غادي يفرجك، المغربي فيها مواطن من درجة التالتة بعد الخليجي والكاوري، حتى الطلابة مكيطلبوكش فبعض الأماكن، وهناك أماكن ممنوعة على كحل الراس بحال واحد الفندق الذي وحسب الأسطورة يعود لأحد أفراد العائلة العلوية، لولا الهواريون وموالين لفارم والسفيانيون المرايسية لضاع ليل أكادير، الهدف من السهر هنا هو تضبر على قحبة، على خلاف عدة مدن أخرى لي فيها أماكن فين يديفولا لواحد ويسهر وينشط ويعربط ويرجع لدارو ينعس، أماكن للنشاط ماشي لحل بروبليم تاع النيك.
لم أكمل الأسبوع بعد حتى أصبحت ممنوعا من عدة اماكن فالمدينة فمازازيك خرجوني لأنني دخلت سكران كاو مباشرة من الباب للبيست وبقيت كنشطح رقصة لعبابلة الرحمانية وانا كنغوت أثناء تأدية المغنية لإحدى الأغاني الخليجية: وا العلوة العلوة، ديك ساعة حتا عليا فيدور وقالي شوف أخويا داكشي ديال لهيه ماتديروش عندنا هنا، قتليه أنا راه كاتيب فكود قاليا أنا فيدور فمازازيك، فالباب تلاقيت فيدور سبقليه خدم فطنجة قالي: شوف أخويا هنا بنادم كيجي باش يشرب ويشد شيشة وييبقى يبحلص هنا مكاين لا إم ديما لا إيكسطا لا لا بيضة لا كحلة بنادم مكواني وشاد القنت مكاينش داكشي ديال طنجة، ففاكتوري نهار نكون سكران مندخلش نهار نكون صاحي مرحبا، كذلك فموخيتو فباباكايو، وفعدة أماكن.
فأماكن شعيبة يتكرر الإهداء : فخاطر لمرايسية فخاطر سوق السمك من الباب حتى لباب ومن الصباح حتى للصباح فخاطر بنسركاو والدشيرة ، وهادي فخاطر وليدات أمصيرنات وسيدي يوسف، ومنساوش الجرف، هنا بنادم ناشط خالق السعادة ومعاه لقصارة، والربعين باقا ماواصلاش بزاف لهاد لقنات على خلاف أماكن لاجونيس لي كتلقى كاع الطوابل محطوطة فيهم ريد بول، حتى لوهلة ظنيت أن اشاعة الربعين روجاتها شركة ريد بول باش تزيد الإستهلاك ديال مشروباتها، كازا والرباط فرزات طبقة اجتماعية جديدة من شباب قراو وخدموا بصاليرات مزيانين كيأهلوهم أنهم يسهرو ويعيشو الليل وبالطبع تخلقات أماكن لي يمكن تستقطب هاد الفئة وتوفرليها داكشي لي باغا، فطنجة بداو كيبانو بحال هاد لبلايص كذلك فمراكش، فأكادير كاينين البعض منهم ولكن الزبائن لي كيعيشو داك نمط الحياة هوما لي قلال بحكم أن خدامي أكادير وحسب أبنائها الحاملي لشهادات من مدارس عليا مافيها مايدار.
في أحد سهراتي هنا وملي وصلت لمرحلة كيولي يبانليك كل ما يتحرك هدف، كنت سايك الطوموبيل ودايز من حدا البلدية، حتى بانتلي وحدة واقفة، فرانيت درت السينيالات بربعة( وقوف اظطراري لحل بروبليم تاع النيك) نزل عندها صاحبي، بينما هو كيتفاصل معها،( حسب ماقال أنها طلبات ليه 500 درهم لينا بجوج وعطاها هو 200)، وقفات السطافيط الأخت هربات، بدا الحوار الكلاسيكي:
_لاكارط ديالك.
_ولد طنجة نتا آش كاتدير هنا.
_سياحة أشاف.
وهو ينطق الشيفور فالجيهة لخرى: شوف غي جينا ديريكت بلا متكذب ونتعاملو معاك زوين، حنا راه عارفين آش كاين، آش خدام نتا بعدا.
_ كاتيب فكود
_ آش تتكتب، كنكتب الرأي.
_ إيوا آشنو رأيك فهادشي.
_ أشاف أنا راه براني وماعارف والو وغي مسركل.
_ علاش واقفين هنا بالظبط.
فديك الساعة كان داز صاحبي جيهة الشيفور دوا معاه وسلم عليه، وهو يرد ليا صاحبو لاكارط ديالي من بعد مقيد السمية فواحد الورقة وقالي تهلى.
من بعد غادي نعرف من صاحبي أننا كنا واقفين على لوبية كايدير الطروطوار، أولي حاي، هادي هي لي كانت ناقصاني فالمناتيف، وبقيت كنأكد على عشيري، أوه وديك الكارية وديك لاطاي وداك الصدر وداك لوجيه.... أييييه راه حتى أنا مشيت زالك فاللول حتى حققتليه فرجليه بانو ليا قد رجليا أو كثر....هاناري فلتنا منها، كنت غادي نلحق على أسامة لخليفي، فالمونتيف اللول راه الواليدة تكرفصات ولكن تهلات فهاد المونتيف والله لاعقلات عليا، أو يعقل عليا شي حد، تحركنا من تم بإتجاه سناك السلام وأنا كنفكر فديك الورقة لي قيد فيها سميتي رفقة عدة أسماء أخرى، وفكرت فربما أنها لائحة خاصة بصحاب المسوس، وغادا تزادني حتى هادي فسيفي ديالي عند موالين الوقت، عدمي وكيضرب المسوس، ماتبغيهاش حتى لعدوك.