ضحايا مافيا العقار ببرشيد خايفين من البارود: بغينا كاع اللي مكلفين بالقضاء يراقبو حكم "النقض" باش ما تكررش مجزرة سطات ويقلبو على اعضاء هاد المافيا وشكون يحركها

قال ضحايا مافيا العقار ببرشيد =ورثة عقار فيه 150 هكتار= باللي مخلوعين على مآل قضيتهم اللي غادي يحسم فيها النقض غدا لثلاث وفنفس الوقت عندهم ثقة فقضاء بلادهم. ورثة العقار خايفين وفق تصريحاتهم ل"كود"٬ من حكم كيف وقع فالاستئناف واللي عتابرو باللي فيه عيوب كبيرة واعتماد على وثيقة عدلية لشخص ما عندو علاقة بالورثة.
دابا الورثة باغيين السلطة القضائية والمفتشية العامة يراقبو هاد الحكم ويكونو حقانيين ويصلحو ما اعتبروه فضايح. واضافو٬ بلا ما يعطيو تفاصيل اكثر٬ باللي باغيين قضاء بلادهم يحكم بلا ضغط بلا تأثير خارجي من مافيا مداخلة فكلشي وباللي عندهم الثقة الكاملة فهاد القضاء
جريدة "الصباح" فعددها ليومه الاثنين 12 فبراير 2024 كانت فجرات زلزال كبير بخصوص ورثة هاد العقار اللي فيه 150 هكتار.
حسب ما جاء فتصريحاتهم فهاد المافيا ابطالها مخبيين وراء سمسار وبداو باستخدام كاع الوسائل باش يباشرو "إجراءات قضائية من أجل "انتزاع حيازة العقار كله". فهاد السياق المافيا ومن يحركها دارت وثيقة عدلية بعنوان "جعل ووكالة" ل"شخص غريب عن العقار ويتحدر من تزنيت". الهدف يدخلو للمحكمة. وعدوه حقاش كلشي ديالهم٬ باش يعطيوه نص العقار واقتناء النصف الثاني بمليار واخا ثمنو تحدد 60 مليارا. الغريب يضيف الورثة ل"الصباح" ان العقار اليوم عبارة عن رسمين عقاريين، أي محفظا ومطهرا من كل تحملات.
لكن هاد الورثة خايفين٬ تضيف "الصباح"٬ من قوة هاد المافيا وتأثيرها على القضاء. اللي خالعهم ان "ملفهم بمحكمة النقض تم تسريع تعيينه بعد الطعن في قرار استئنافي صدر عن محكمة الاستئناف بسطات، تحت عدد 173/1401/2022، اعتبروه غريبا وظالما، إذ أنه أدرج بجلسة يوم غد (الثلاثاء 13 فبراير)، رغم أن هناك ملفات معروضة على النقض منذ 2021 لم يتم تعيينها بعد، ما أشعرهم بأن أيادي خفية تقف وراء السمسار، تتحكم في قضيتهم. مؤكدين أنهم ينتظرون بفارغ الصبر ما إذا كانت محكمة النقض، ستنتصر للقانون والدستور، سيما أن الرسم العقاري نهائي ولا يقبل الطعن، أم أنهم سيعودون إلى نقطة الصفر، وتتحقق مضامين وثيقة "الجعل" التي التزم فيها السمسار، المعروف بعلاقته ب"البارود"، بالتكلف بالمحاكم والدعاوى"