واخا موفرة ليهم الدولة ميزانية بالملايير ..كلاب ضالة ومريضة وسط أحياء عين عتيق والسوق الاسبوعي عامر حشرات ووسخ ورئيس الجماعة والمنتخبين فعين غفلون (صور)

ماشي بعيد على عاصمة الأنوار، مدينة عين عتيق لي جات فموقع استراتيجي (دايزا منها الطريقة الوطنية ولوطوروت وقريبة للهرهورة ) غارقا فالازبال وضعف النقل العمومي وزيد عليها ظاهرة الكلاب الضالة والمريضة اللي كتعيش وسط احياء سكانية.
رئيس جماعة عين عتيق، للي مقابل غير الصراعات مع النواب ديالو والولائم والعراضات ممسوقش لا لمطالب الساكنة ولا لظروف العيش ديالهم، سيد غادي جاي فسيارة الدولة واخا يكون نهار الاحد يوم عطلة وهو راكب فيها حسب ما عاينته "گود".
دبا ها الجماعة لي مخصصة فلوس صحيحة لمعالجة ظاهرة الكلاب الضالة والقطط والفيران، بحيث كاين مركز جهوي مجهز وفيه اطباء بيطريين باش يتكلفو بالكلاب الضالة والمريضة، الا ان رئيس الجماعة فعين غفلون وبعيد على عين عتيق، مدار حتى خطوة فاتجاه حماية هاد الحيوانات الاليفة وكذا حماية الساكنة من الامراض اللي كتهز ها الكلاب.
مجلس جماعة عين عتيق، كيجتهد فقط فاش تيكون تدشين ملكي فشي منطقة قريبة لهاد المدينة، بحيث كيغرس فالاشجار ويصبغ فالطرقان ويقاد الانارة. وحتى السوق الاسبوع عامر زبل وحشرات كيف كتبين الصور، مدينة داير فيه لوبي العقار مداير لي مستفدين من الدعم ديال الدولة باش يديرو سكن اقتصادي عامر خروقات (موضوع نرجعو ليه لاحقا).
مجلس مقدرش حتى يوفر ابسط الخدمات للساكنة، وكتلقا الاجتماعات ديالو فيه صداع ومضاربات بين النواب والرئيس.
اغلب الاقامات فهاد المدينة كتعرف غياب النظافة وتراكم الازبال، وهادشي يؤكد بلي الجماعة مدارتش خدمتها ومزيراتش شركة اوزون لي كانت فالولاية السابقة قبل ما تمشي بحالها هاد العام وطبعا كولشي عارف قصتها واللي سالات باعتقال مدير الشركة البداروي.
اذا كانت الرباط كتمشي بسرعة خيالية فتقدم الأشغال والنظافة والإنارة ووو، فراه غير مدن قريب ليها عايشا فالوحل، من تمارة الى عين عتيق ثم عين عودة وحتى الهرهورة غارقا فالاختلالات ديال التعمير والفوضى فالتدبير.
الوالي محمد اليعقوبي هو عامل اقليم تمارة الصخيرات، باقي مدارش حملة بونظيف لهاد المدن، خاص تفعيل المحاسبة فحق منتخبين ورجال سلطة كيعطلو فالمشاريع ويعرقلو مصالح المستثمرين والساكنة.
الداخلية خصصت العام لي فات 2023 مبلغ 12 مليار سنتيم لدعم الجماعات الترابية من أجل توفير الخدمات المرتبطة بالوقاية الصحية، عبر تنفيذ عدة برامج وتمويل وتتبع مشاريع متعلقة بمحاربة نواقل الأمراض، وتدبير ظاهرة الكلاب والقطط الضالة، ومحاربة داء السعار. واش هاد الميزانية تنفذت بشكل صحيح؟.