ماجدولين الادريسي: كنترمضن والنهار الاول صمت كلت بالتخبية وما كيقنعنيش التويشيات فالفطور واللي حطهم لي يصطيني

واش عاقلة على اول نهار صمتي فيه؟
صمت مللي كانت عندي شي عشر سنين تقريبا، كنت باقية صغيرة، ولكن ما قدرتش نكمل النهار وكليت بالتخبية، غير هي هاديك التخبية ما صدقاتش حقاش عاقت بي عائلتي
أش نا هو الكادو اللي عطاوه ليك؟
ما عطاوني والو، يمكن حقاش عاقو بي
واش انتي من الناس اللي كيترمضنو؟
طبعا كنترمضن. مللي كتبقى شي ساعة للفطور كنحاول نبعد من كلشي. ما كنهدر مع حد، كيجيني الجوع بزاف. على هاد القبال كناخد التيقار
فاش كدوزي وقتك فرمضان؟
كنحاول ما نفيقش بكري ومللي كتوصل الثلاثة كنبغي نخرج لسوبر مارشي والباتيسريات، عزيز علي نشوف وندور. ومن بعد كنخرج البيرطو (كلبي) يتسارى
وبعد لفطور؟
كيجيو عندي صحابي فالدار، عزيز علي نبقى مع اللي عزيز علي بعد لفطور
أش ناهي الشهيوات اللي عزيزة عليك تكون فوق الطابلة؟
أنا من النوع اللي عزيز عليه ياكل مزيان، ما كيقنعنيش البغرير والشباكية عزيز علي القضبان والكفتة، واللي مشى حتى حط لي التيوشيات راه يفليبيني