رحلة البحث عن معلومة عند جيشنا المغربي. تلفون ما خدامش واستمرار صمت المؤسسة مع ارتفاع خوف المغاربة وها للي لقينا: القوات المسلحة الملكية تشارك مع 8 دول في مناورات لصد استعمال 11 طائرة ليبية مفقودة

بغينا ف"كود" نجربو الاتصال بالقيادة العامة للقوات المسلحة الملكية. فغياب مخاطب رسمي معروف ومخول واخا عارفين باللي كاين واحد خلية التواصل كبيرة وقوية فالجيش، اتصلنا ب160، وطلبنا منهم يعطيونا رسم القيادة، حتى هما تالفين. عطاونا جوجت الارقام ديال الفيكس فالرباط، ولكن واحد كيسالي ب11 والثاني ب49. التلفون الاول ديما مشغول ما كاين حد كيجاوب. جربنا اكثر من عشر مرات والو. جربنا الثاني لقيناه ديال الحامية العسكرية واخا الناس ديال 160 كتبو لينا فميساج باللي ديال القيادة العامة.
هاد الباب مسدود ما كاين حتى شي جواب وقلبنا واش عند الجيش شي موقع خاص بهم بحالهم بحال جيوش الدول ما لقينا والو. كنا عارفين ف"كود" باللي واخا يرد شي واحد على التلفون راه حتى واحد ما كيبغبي حتى يهدر معاك. من بعد كلنا نشوفو الناس اللي عندهم مع الجيش نسولوهم ولا نسولو ناس الجيش اللي كنعرفو يكولو لينا اش واقع وعلاش هاد السلاح اللي غادي ويتنشر فالمدن وعلاش هاد الجيش ديالنا ساكت ضارب الطم. المعطيات اللي حصلت عليها "كود" كالت باللي "العقلية ديال العسكر ما كتبدلش: ما كاين بيانات الا فالمناسبات لكبيرة بزاف". واش هاد الشي يعني ان نشر صواريخ مضادة للطائرات ماشي مهم؟ "هاد الشي اللي واقع يقدرو يدخلوه فالمهم ولكن مازال ما بانش ليهم يستحق نشر بيان" يرد مصدر "كود".
وهاد خلية الصحافة اش كدير؟ تطرح "كود" السؤال. الجواب بعقلية عسكرية لا تريد التطور والانفتاح "هاديك حتى واحد فيها ما عندو صلاحية الحديث باسم الجيش. ايلى كان بيان خاص الجينرال عروب يوقعوا ويتشاور حتى هو حقاش الملك هو القائد الاعلى للقوات المسلحة الملكية" يعني ما كاينة هدرة
دابا باقي لينا الحكومة حقاش فيها وزير منتدب مكلف بالدفاع الوطني "الحكومة غادية فاتجاه توضيح الامر عبر بيان" يرد مصدر حكومي. يمتى ينشر وشكون غادي يديرو؟ "حتى هي مازال ما وضحات عندها الصورة"
مشينا قلبنا على واحد الصفحة فالفايسبوك اسمه "القوات المسلحة الملكية المغربية " طبعا ما كاين حتى شي حاجة كتأكد باللي ديال القوات المسلحة وفنفس الوقت ما كاين حتى شي حاجة كتنفي باللي ديالهم. حنا غادين نكولو ديالهم لان القيادة العامة كان بايميل لادارة الفايسبوك توقفها ولا تصدر بيان تتبرأ منها وهاد الشي ما وقعش. اش كتكول الصفحة؟ "تستعدّ القوات المسلّحة الملكيّة للمشاركة ضمن مناورة دوليّة من أجل صدّ التهديدات الإرهابيّة التي تطال المغاربة بعد إعلان السلطات الليبيّة عن فقد 11 طائرة مدنيّة من مطار طرابلس ووفود تحذيرات غربية، مبنيّة على معطيات استخباراتيّة، تقول إنّ المغرب من بين أهداف إرهابيّين وضعوا أيديهم على آليات الطيران المفقودة"
واضافت ان هذه المناورة تشارك فيها 8 دول الى جوار العسكر المغربيّ ضمن هذه المناورة التدريبيّة، ويتعلق الأمر بكل من جيوش إسبانيا وفرنسا والبرتغال وإيطاليا ومالطا، إلى جوار عسكر موريتانيا وتونس والجزائر، على أن يتركز التعاطي، خلال التفعيل الميداني، مع تنفيذ تحركات قتالية مشتركة لصدّ أي استعمال للطائرات المفقودة بليبيا، تقودها عناصر إرهابية مدربة على التحليق، في هجمات تحاكي ما تمّ يوم 11 شتنبر 2001 بمانهاتن الأمريكيّة.
كما اوضحت ان "القوات المسلحة الملكية قد أقدمت على وضع بطاريات صواريخ منصوبة بعدد من المدن المغربيّة، بجوار منشآت حسّاسة وأخرى تعتبر معرضة لتهديدات الإرهاب، كما وضعت المقاتلات المغربيّة وأطرها من القناصين على أهبة الاستعداد، في حين تم التشديد على الضوابط الدولية ضمن استعمال المجال الجوي الوطنيّ، مع التدقيق بكلّ ما تلتقطه رادارات الملاحة من آليات تعبر سماء المغرب أو جوارها".
وختمت "المناورات التي يحضرها الجيش، ستتم باعتبار المغرب واحدا من المنتمين للحلف الدفاعي والأمني الذي تشكّله دول غرب البحر الأبيض المتوسّط، وهو الشهير بالتسمية الإعلاميَّة "5+5"، في الوقت الذي استثنيت ليبيا من هذه التدريبات، التي سيعلن تاريخها ومكانها لاحيا، بالنظر إلى الظرفية الحالية التي تعرف حالة من "اللاّ أمن" بالبلد".
هاد الكلام هو الوحيد اللي لقيناه على نشر هاد الاسلحة الثقيلة في عدد من المدن في انتظار ان يخرج المؤسسة العسكرية عن صمتها غير المبرر والذي لا يزيد الا في ارهاب المواطن المغربي وخوفه